Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 344 Hüküm no: 435 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Nokta Mehmed Paşa suyolunun keşfi [Derkenâr:] Bayram Paşa kapı kethüdâsı Pîrî mahallesinde zevcesi Meryem bt. Nokta Mehmed Paşa suyu. Düstûr-ı mükerrem müşîr-i müfahham, nizâmü’l-âlem, müdebbirü’l-umûri’l-cumhûr bi’l-fikri’s-sâkıb, mütemmimi mehâmmü’l-enâmi bi’r-re’yi’s-sâkıb, müşeyyidü erkânü’s-sa‘âdeti ve’l-iclâl mümehhidü bünyânü’d-devleti ve’l-ikbâl, el-mahfûfu bi sunûfi’l-avâtıfi’l-meliki’l-müte‘âl vezîr-i a‘zam, serdâr-ı ekrem Bayram Paşa -yesserallâhu mâ yürîd ve mâ yeşâ’- hazretlerinin bi’l-fi‘l mahmiye-i İstanbul’da kapı kethüdâları olup mahmiye-i merkūmede Pîrî Ağa mahallesinde sâkine zevcesi fahrü’l-muhadderât zahrü’l-muvakkarât Meryem Hâtun ibnetü’l-merhûm Nokta Mehmed Paşa tarafından husûs-ı âti’z-zikre vekîl olup hasm-ı câhid mahzarında nehc-i şer‘î üzre vekâleti sâbite olan dergâh-ı âlî -dâme mahfûfen bi’l-me‘âlî- müteferrikalarından kıdvetü’l-emâcid ve’l-a‘yân makbûlü’s-sudûr ve’l-erkân Ali Ağa b. Pervâne mahfil-i kazâya gelip bi’l-vekâle takrîr-i kelâm ve bast-ı merâm edip müvekkile-i müşârün-ileyhânın babası merhûm-ı mezbûr Mehmed Paşa Havâss-ı Refî‘a kazâsı müzâfâtından Müderris köyü demekle ma‘rûfe olan karyenin cânib-i şimâlinde vâki‘ derede hafr ettirdiği âbâr-ı müteferrikadan cem‘ edip yine mahmiye-i mezbûrede vâki‘ Tevekkül çeşmesi’nde ve mahalle-i mezbûrda olan sarayında icrâ eylediği üç masura suyun yolları mürûr-ı eyyâm ve kürûr-ı a‘vâm ile harâb olup zikr olunan üç masura su bir nice zamân cereyândan kalıp bi’l-külliye münkatı‘ olmağın müvekkile-i mûmâ-ileyhânın izni ile menşe’inden makarrına varınca yollarını kendi malımdan tecdîd ettirip sâlifü’z-zikr çeşmede ve sarayında ke’l-evvel icrâ ettirmişidim hâlâ müvekkile-i müşârün-ileyhâ zikr olunan su yoluna harc ve sarf eylediğim meblağın mertebe-i tahammülü keşf ve tahrîr olunmasın taleb ederler dedikde mahkeme-i şerîfeden mevlânâ Receb Efendi b. Abdi irsâl olunup ol dahi bi’l-fi‘l su yolu nâzırı olan kıdvetü’l-emâsil ve’l-akrân Hasan Ağa b. Abdülmennân ve su yolcular kethüdâsı olan Mehmed Kethüdâ ve Sultan Mehmed Hân suyolcuları bölükbaşısı olan Mahmud b. Ali ve Hâssa su yolcularından Mahmud b. Abdullah, üstâd İbrahim b. Abdullah ve zeyl-i kitâbda mastûrü’l-esâmî olan müslimîn ile mârrü’z-zikr su yolunun üzerine varıp vekîl-i mezbûrun tecdîd eylediği ve mevâzi‘i keşf ve müşâhede ve mu‘âyene eylediklerinde mezbûrân Hasan Ağa ve Mehmed Kethüdâ ve merkūmûn Mahmud ve diğer Mahmud ve İbrahim ve sâir müslimîn ile zikr olunan suyun başından kurbunda vâki‘ vezîr-i müşârün-ileyh hazretlerinin suları kemerine gelince iki yüz yetmiş yedi kulaç lağımın her bir kulacının tathîri için altmışar akçeden cem‘an altı bin altı yüz yirmi akçe ve zikr olunan kemere gelinceye değin müceddeden vaz‘ olunan yedi yüz aded künkün her biri lökünü ile ve üstâdiyyesi ve sâir levâzımı ile yirmişer akçeden cem‘an on dört bin akçe ve zikr olunan Tevekkül çeşmesi’nden dahi kendi sarayına varıncaya değin müceddeden vaz‘ olunan üç yüz yedi aded kurşun borunun her biri cümle levâzımı ile ikişer yüz otuz akçeden yetmiş bin altı yüz yirmi akçe ki yüz bir bin iki yüz otuz akçe vekîl-i mezbûr Ali Ağa’nın harc ve sarf eylediğini tahmîn-i sahîh ile tahmîn ve ittifâk ve ittihâd eylediklerini mevlânâ-yı mezbûr mahallinde tahrîr, ba‘dehû gelip meclis-i şer‘de inhâ ve takrîr etmeğin mâ hüve’l-vâki‘ ketb ve imlâ olundu. Fî evâhiri Şevvâli’l-mükerrem li sene seb‘a ve erba‘în ve elf. Şuhûdü’l-hâl: Himmet Efendi b. İbrahim el-İmâm, Halil Ağa b. İbrahim el-Müteferrika, Osman b. Bayram el-Bevvâbü’s-sultânî, Yusuf b. Abdullah, Eyüb b. Ahmed, İbrahim b. Durmuş, Mehmed b. Abdullah el-Cündî, Sâlih b. Mahmud ve gayruhüm.