Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 348 Hüküm no: 439 Orijinal metin no: [71b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed’in, çiftliği ile içindeki hayvanlar ve vakıf tarlalarının yarısını kızı Hayri Hatun’a hibe ettiği Mahmiye-i İstanbul’da Elvanzâde mahallesinde sâkin dergâh-ı âlî müteferrikalarından kıdvetü’l-emâsil ve’l-akrân Ahmed Ağa b. Mehmed mahfil-i kazâda mahalle-i mezbûrede sâkine sulbiye kebîre kızı işbu râfi‘atü’l-kitâb Hayri Hâtun tarafından ikrâr-ı âti’z-zikri tasdîka vekîl olup hasm-ı câhid mahzarında mezbûreyi ma‘rifet-i şer‘iyye ile ârifeyn olan Beşir Efendi b. Ömer ve Mehmed b. Ali şehâdetleri ile şer‘an vekâleti sâbite olan fahrü’l-müderrisîn Osman Efendi b. Mehdi mahzarında ikrâr ve i‘tirâf edip Havâss-ı Refî‘a müzâfâtından Terkos nâhiyesine tâbi‘ Tirkeşe nâm karyede vâki‘ etrâf-ı erba‘ası mutasarrıf olduğum bağ ve tarla ve çayır ve tarîk-i âm ile mahdûd olup muhavvata-i dâhiliyyeli üç bâb fevkānî ve iki bâb tahtânî odaları ve iki çatma anbarı ve bir kenîfi ve zât eşcâr-ı müsmire ve gayr-ı müsmire hadîkayı ve bir mikdâr bağ ve havuz ve bir çeşmeyi ve muhavvata-i hâriciyyesi ocaklı iki ahırı ve bir samanlığı ve bir çeşmeyi ve bir mikdâr samanlığı müştemil olan çiftlik ta‘bîr olunur mülk menzilimin nısf-ı müfrez-i mu‘ayyenesini ve on re’s kara sığır öküzünün beş re’sini ve otuz re’s kara sığır danalarının on beş re’sini sulbiye kızım mezbûre Hayri Hâtun’a hibe-i sahîha-i şer‘iyye ile hibe ve temlîk ve teslîm eyledim ol dahi meclis-i hibede ittihâb ve temellük ve kabz ve tesellüm eyledi ve yine merhûm-ı mağfûr Ebü’l-feth Sultan Mehmed Hân evkāfı arâzisinden o[lup] kadîmden çiftlik-i mezbûr ile mutasarrıf [72a] olduğum mevâzi‘-i müteferrikada vâki‘ inde’l-cîrân ma‘lûmü’l-hudûd olan on iki kıt‘a tarla ve bir kıt‘a çayırımın her birinden nısf-ı müfrez-i mu‘ayyeninin hakk-ı tasarrufunu evkāf-ı mezbûre mütevellîsi ma‘rifetiyle mezbûre Hayri Hâtun’a tefvîz eyledim ol dahi vech-i muharrer üzre tefevvuz ve kabûl eyledi dedikde mukırr-ı mezbûr Ahmed Ağa’nın vech-i meşrûh üzre cârî olan ikrârını vekîl-i müşârün-ileyh Osman Efendi vicâhen tasdîk ve şifâhen tahkīk edicek mâ vaka‘a ketb olundu. Târihuhü’l-mezbûr. Şuhûdü’l-hâl: Şeyh Şaban Efendi b. Abdülmennân, Muharrem Ağa b. Hüseyin, Köse Mehmed Bey b. Yusuf, Yusuf Çavuş, İbrahim Çelebi, Hüseyin b. Hasan, Mustafa b. Pîrî, Ali Halîfe el-İmâm, Mehmed b. Yusuf, Mehmed Kethüdâ b. Abdullah, Yusuf Çelebi b. Nasuh, Abdülkādir el-Eyyûbî, Ebûbekir b. İbrahim, Cafer Bey b. Abdullah ve gayruhüm.