Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 348 Hüküm no: 440 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sevindik b. Osman’ın, miras tarlalardaki hissesini kardeşi Ruşen’e sattığı Vilâyet-i Anadolu’da Kangırı sancağında Bocuru kazâsına tâbi‘ Sindeller nâm karyeden olup hâlâ mahmiye-i Galata müzâfâtından kasaba-i Tophâne mahallâtından Cihangir mahallesi sâkinlerinden olan Sevindik b. Osman nâm kimesne mahfil-i kazâda li ebeveyn karındaşı râfi‘-i hâze’l-kitâb Rûşen nâm kimesne muvâcehesinde bi’t-tav‘ ikrâr ve i‘tirâf edip karye-i merkūmede vâki‘ ma‘lûmü’l-hudûd olup babamız merkūm Osman’dan intikāl-i âdî ile ikimize intikāl eden tahmînen altmış [keyl] tohum istî‘âb eder on beş kıt‘a tarlanın her birinden ben mutasarrıf olduğum nısf hisse-i mu‘ayyeninin hakk-ı tasarrufunu, karındaşım merkūm Rûşen’e iki bin sekiz yüz akçe bedel-i tefvîz ve sâhib-i arz ma‘rifetiyle tefvîz edip ol dahi vech-i muharrer üzre tefevvuz ve kabûl eyledikden sonra meblağ-ı mezbûr iki bin sekiz yüz akçeyi bi tamâmihî mezbûr Rûşen yedinden ahz ve kabz edip zikr olunan beş kıt‘a tarladan her birinin nısf-ı mu‘ayyenini dahi mahallinde zabt ve tasarrufa taslît eyledim ba‘de’l-yevm sâlifü’z-zikr olan beş kıt‘a tarlaların cümlesi mezbûr Rûşen’in dâhil-i taht-ı tasarrufu olup min ba‘d benim alâkam kalmamışdır dedikde mukırr-ı mezbûr Sevindik’in ikrâr-ı meşrûhunu el-mukarru lehü’l-merkūm Rûşen vicâhen tasdîk ve şifâhen tahkīk edicek mâ vaka‘a ketb olundu. Fi’l-yevmi’l-hâmis min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Zahrü’l-kuzât Ahmed Efendi el-Kadı, Hüseyin Efendi b. Ali, Abdi Efendi el-Kadı, Mehmed Çelebi b. İvaz, Ömer Efendi b. el-Hâc Hasan.