Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 349 Hüküm no: 441 Orijinal metin no: [72a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Mehmed Efendi’nin menzilini Mehmed Efendi b. Osman’a sattığı Sâbıkan Kudüs-i şerîf kadısı olan a‘lemü’l-ulemâ’i’l-izâm, efdalü’l-fuzalâ’i’l-fihâm, yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî, alemü’l-ilm ve’l-hüdâ, menârü’l-fazl ve’t-tukā Şeyh Mehmed Efendi eş-şehîr bi Kadızâde hazretlerinin taraf-ı karînü’ş-şereflerinden ikrâr-ı câ’i’l-beyâna vekîl olup vekâleti Receb Efendi b. Bahşî ve Mehmed Efendi b. Abdullah şehâdetleri ile sâbite olan Ahmed Efendi b. Mehmed mahfil-i kazâda sâbıkan İstanbul mukāta‘acısı olan sâhib-i hâze’l-kitâb fahrü erbâbi’t-tahrîr ve’l-kalem zahrü ashâbi’t-takrîr ve’r-rakam Mehmed Efendi b. Osman muvâcehesinde bi’l-vekâle ikrâr ve takrîr-i kelâm edip müvekkilim müşârün-ileyh Şeyh Mehmed Efendi hazretlerinin silk-i mülk-i sahîhlerinde münselik olan emlâklerinden olup Havâss-ı Refî‘a -humiyet ani’l-beliyye- müzâfâtından Hasköy mahallâtından Sütlüce mahallesinde merhûm Mahmud Ağa câmi‘-i şerîfi kurbunda vâki‘ bir tarafdan merhûm-ı mezbûr Mahmud Ağa vakfı ve bir tarafdan Süleyman Çavuş nâm kimesne mülkü ve bir tarafdan bahr ve taraf-ı râbi‘den tarîk-i âm ile mahdûd tahtânî iki bâb fevkānî harâba müşrif odayı ve arz-ı hâliyeyi müştemil mülk menzilini, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mûmâ-ileyh Mehmed Efendi’ye fıddî nakd-i râyic fi’l-vakt elli bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm eyledikden sonra meblağ-ı mezbûr elli bin akçeyi bi tamâmihî [mû]mâ-ileyh Mehmed Efendi yedinden ahz ve kabz eylemişlerdir ba‘de’l-yevm menzil-i merkūm müşârün-ileyh Mehmed Efendi’nin mülk-i müşterâsıdır. Keyfe mâ [yeşâ’] ve hasbe mâ yahtâr mutasarrıf olsun dedikde merkūm Ahmed Efendi’nin bi’l-vekâle cârî olan ikrârını dahi el-mukarru lehü’l-merkūm Mehmed Efendi vicâhen tasdîk ve şifâhen tahkīk edicek mâ hüve’l-vâki‘ ketb olundu. Fi’l-yevmi’s-sâdis min Zilka‘deti’ş-şerîfe li sene seb‘a ve erba‘în ve elf min hicreti’n-Nebeviyye alâ sâhibihâ efdalü’t-tahiyye. Şuhûdü’l-hâl: El-Hâc Şaban b. Abdullah es-sâkini bi mahalleti Ayasofya, Süleyman Bey b. el-Bevvâbü’s-sultânî es-sâkini bi mahalleti Hoca Paşa, Mustafa Efendi el-Kâtib, Mehmed Çelebi b. ( ) es-sâkin-i m[ahalle-i mezbûr] el-İmâm, Abdülkādir Çelebi b. Mehmed Efendi el-Kâtib, Muharrirü’l-hurûf Mustafa, Siyâmi Efendi el-Mukayyid ve gayruhüm.