Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 350 Hüküm no: 442 Orijinal metin no: [72a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed Çelebi b. Seyyid Mehmed’in vakıf menzili Abdülkâdir b. Ahmed’e devrettiği Medîne-i Hazret-i Ebî Eyyûb el-Ensârî mahallâtından Câmi‘-i Kebîr mahallesinde sâkin es-Seyyid Mehmed Çelebi b. es-Seyyid Mehmed mahfil-i kazâda işbu râfi‘ü’l-kitâb sulehâdan Abdülkādir b. Ahmed mahzarında ikrâr ve i‘tirâf edip mahalle-i merkūmede vâki‘ merhûm hakkâk Mehmed Çelebi nâm kimesne vakf ve süknâsını sulehâya şart eylediği iki bâb fevkānî ve iki bâb tahtânî odaları ve muhavvatayı müştemil bir tarafı börekçi Mustafa mülkü ve bir tarafı el-Hâc Osman mülkü ve bir tarafı Mehmed Efendi mülkü ve bir tarafı börekçi el-Hâc Ali mülkü ile mahdûd olup bundan akdem kendi malım ile cânib-i şer‘den izinle ta‘mîr ve meremmet edip ber mûceb-i şart-ı vâkıf bi’l-fi‘l mutasarrıf olduğum menzil-i mevkūfun süknâsını ma‘rifet-i mütevellî ile sulehâdan merkūm Abdülkādir’e dört bin nakd-i râyic fi’l-vakt fıddî akçe mukābelesinde ferâgat eyleyip ol dahi vech-i muharrer üzre kabûl eyledikden sonra meblağ-ı mezbûr dört bin akçeyi yedinden bi’t-tamâm ve’l-kemâl ahz ve kabz edip menzil-i mezbûru teslîm eyledim dedikde gıbbe’t-tasdîk ketb olundu. Hurrire fî gurreti Zilka‘deti’ş-şerîfe fî târihuhu’l-mezbûr. Şuhûdü’l-hâl: Receb Efendi b. Abdi, Sâfi Efendi b. Tahir, Mustafa Efendi, Yakub b. Kurd, Ali b. Mustafa, Mustafa b. Veli.