Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 229 Hüküm no: 229 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Nikola’nın Süleyman Ağa Vakfı’ndan borç aldığı Mahmiye-i İstanbul’da Acemî Gulâmı meydanı kurbunda bakkal olan Todori v. Nikola nâm zimmî meclis-i şer‘-i hatîrde mahmiye-i mezkûrede Kalenderhâne mahallesinde vâki‘ merhûm Davud Ağa binâ eylediği çeşmenin mühimmât-ı lâzımesine merhûm Süleyman Ağa nâm sâhib-i hayrın vakf[ı] olan nukūddan meşrûtiyyet üzre mütevellî olan Hacı Mehmed Ağa b. Süleyman nâm kimesne mahzarında tav‘an ikrâr ve takrîr-i kelâm edip târih-i kitâbdan iki yüz dokuz gün mukaddem mütevellî-i merkūm Hacı Mehmed Ağa yedinde olan mâl-ı vakf-ı mezbûrdan iktirâz ve kabz eylediğim altı yüz yirmi beş kâmilü’l-ayar riyâlî kebîr guruş ve semeni târih-i mezbûrdan üç yüz altmış gün tamâmına değin müeccel ve mev‘ûd mütevellî-i merkūm Hacı Mehmed Ağa yedinden müşterâ ve makbûz levn ve zirâ‘ı beynimizde ilm-i şer‘î ile ma‘lûm çuka bahâsından dahi doksan üç riyâlî kebîr guruş ki cem‘an vakf-ı mezbûra zimmetimde yedi yüz on sekiz kıt‘a riyâlî kebîr guruş lâzımü’l-edâ ve vâcibü’l-kazâ deynimdir dedikde gıbbe’t-tasdîk mukırr-ı merkūm Todori’nin sulbî kebîr oğlu Yani ile Dimitri v. Draga ve Nikola v. Maskona ve Dimitri v. Olaş ve Panayot v. Kiryaki ve diğer Panayot v. Roş ve Yani v. İskarlet ve Yani v. Toros ve Dimitri v. Verz ve diğer Dimitri v. Lalo ve Dimitri v. Anto[n], Nikola v. Yanmış nâm zimmîlerden her biri meblağ-ı mezbûr yedi yüz on sekiz riyâlî kebîr guruşa emr ve kabûlü hâviye kefâlet-i sahîha ile kefîl olup ve her biri âharın zimmetine lâzım gelen meblağa dahi kefîller olmağın mâ hüve’l-vâki‘ bi’l-ibtigā ketb olundu. Fi’l-yevmi’l-hâmis min Cumâdelâhire li sene seb‘a ve seb‘în ve elf. Şuhûdü’l-hâl: Nurizâde İbrahim Çelebi, el-Hâc Mehmed Keresteci, Sinan Bey el-Cündî, Hasan Çelebi Helvâyî, Durmuş Çelebi Câbî-i Sultan Bayezid, Şükrullah Bey b. Mustafa.