Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 351 Hüküm no: 443 Orijinal metin no: [72b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. İskender’in tarlasını Hacı Ali b. Kasım ve Mustafa b. Hüseyin’e sattığı Vilâyet-i Rumeli’nde Arnavud Belgradı kazâsına tâbi‘ Sırat nâm karye sâkinlerinden Mustafa b. İskender nâm kimesne meclis-i şer‘-i hatîr-i lâzımü’t-tevkīrde işbu râfi‘â’l-kitâb el-Hâc Ali b. Kasım ve Mustafa [b.] Hüseyin nâm kimesneler mahzarlarında bi’t-tav‘i’s-sâf ikrâr ve i‘tirâf edip karye-i mezbûre sınırında Yaylak nâm mevzi‘de vâki‘ bir tarafdan Aydın nâm kimesne tarlası ve bir tarafdan Mehmed b. İskender tarlası ve bir tarafdan arz-ı hâliye ve bir tarafdan tarîk-i âm ile mahdûd dört dönüm tahmînen bir keyl tohum istî‘âb eder bir kıt‘a tarlamın hakk-ı tasarrufunu, sâhib-i arz ma‘rifetiyle bin yedi yüz akçe mukābelesinde tefvîz edip onlar dahi vech-i meşrûh üzre tefevvuz ve kabûl eyledikden sonra bedel-i tefvîz olan meblağ-ı mezbûr bin yedi yüz akçeyi tamâmen mezbûrân el-Hâc Ali ve Mustafa yedlerinden alıp kabz edip sâlifü’z-zikr tarlayı mahallinde zabt ve tasarrufa mezbûrân el-Hâc [Ali] ve Mustafa’yı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Ali b. İskender, Aydın b. Malkoç, Malkoç b. Ali, Ali Beşe b. Yusuf, İbrahim b. Mehmed.