Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 353 Hüküm no: 445 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İskarlet v. Loti’nin Mehmed b. Abdullah aleyhindeki yaralama davasında sulh olması Husûs-ı âti’l-beyânın mahallinde tahrîri için bi’t-taleb irsâl olunan mevlânâ Receb Efendi zeyl-i kitâbda mastûrü’l-esâmî olan müslimîn ile Havâss-ı Aliyye kazâsı müzâfâtından Terkos nâhiyesine tâbi‘ Ayayorgi nâm karyeye varıp akd-i meclis ettikde karye-i mezbûre sükkânından İskarlet v. Loti meclis-i mezbûrda yine karye-i mezbûre ahâlîsinden işbu bâ‘isü’l-kitâb Mehmed b. Abdullah nâm kimesne muvâcehesinde takrîr-i kelâm edip mezbûr Mehmed târih-i kitâbdan beş gün mukaddem beni sol omzumda kılıç ile hatâen urup mecrûh edip ben dahi mûcebini da‘vâ murâd ettiğimde beynimizde muslihûn tavassut edip mezbûr Mehmed benim ile an ikrâr da‘vâ-yı mezbûremden üç bin fıddî râyic fi’l-vakt akçe üzerine sulh olup ben dahi sulh-i mezbûru kabûl ve bedel-i sulh olan meblağ-ı mezbûr üç bin akçeyi yedinden bi’t-tamâm ve’l-kemâl ahz ve kabz eyledim min ba‘d husûs-ı mezbûra müte‘allik benden ve yahud vekîlimden da‘vâ sâdır olur ise lede’l-hükkâmi’l-kirâm mesmû‘a ve makbûle olmasın dedikde merkūm Mehmed dahi İskarlet’i takrîr-i meşrûhunda bi’l-muvâcehe tasdîk ve bi’l-müşâfehe tahkīk eylediğini mevlânâ-yı mezbûr mahallinde tahrîr, ba‘dehû gelip meclis-i şer‘de inhâ ve takrîr etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâmin min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Ali b. Mustafa, Mehmed b. Arslan, Sefer b. Abdullah, Ahmed b. Mehmed, Arslan b. Abdullah, Ahmed b. Abdullah, Ali b. Mustafa ve gayruhüm.