Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 354 Hüküm no: 446 Orijinal metin no: [73a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Memi b. Ahmed’in mirasının Ramazan ve Hasan b. Ali’ye ait olduğu Havâss-ı Aliyye kazâsı müzâfâtından Küçükçekmece nâhiyesine tâbi‘ Fîruz nâm karye sâkinlerinden olup bundan akdem vefât eden Ali b. Budak nâm kimesnenin sulbî oğulları Hasan ve Ramazan nâm sagīrlerin tesviye-i umûruna kıbel-i şer‘den mansûb vasîleri olan Zülfikār b. Abdullah nâm kimesne karye-i merkūmede sâkin iken müteveffâ olan Memi b. Ahmed nâm kimesnenin zevce-i metrûkesi ve terekesine vâzı‘atü’l-yed olunan Kamer bt. Abdullah nâm hâtun muvâcehesinde üzerine takrîr-i da‘vâ edip müteveffâ-yı mezbûr Memi hâl-i hayâtında sagīrân-ı mezbûrân Hasan ve Ramazan’ın babaları mezbûr Ali’nin babası mersûm Budak kendinin babası mezbûr Ahmed ile li ebeveyn karındaşlar olduğunu kirâren ve mirâren ikrâr ve i‘tirâf edip ol ikrâr üzerine musırran vefât edip sagīrân-ı mezbûrân vech-i meşrûh üzre müteveffâ-yı mezbûr Memi’nin vârisleri iken merkūme Kamer hisse-i irsiyyelerini vermekde ta‘allül eder. Suâl olunup müteveffâ-yı mezbûr Memi’nin terekesinden sagīrân-ı mezbûrân Ramazan ve Hasan’ın hisseleri alıverilmek matlûbumdur dedikde gıbbe’s-suâl mezbûre Kamer cevâbında, sagīrân-ı mezbûrânın müteveffâ-yı mezbûr Memi’ye vech-i meşrûh üzre vâris oldukları ma‘lûmum değildir dedikde vasiyy-i mezbûr Zülfikār’dan müdde‘âsına mutâbık beyyine [taleb] olundukda, udûl-i müslimînden Ahmed Efendi b. Yusuf ve Ahmed b. Abdullah nâm kimesneler meclis-i şer‘a li ecli’ş-şehâde hâzırân olup istişhâd olunduklarında, müteveffâ-yı mezbûr Memi kirâren ve mirâren bizi işhâd edip sagīrân-ı mezbûrânın babaları merkūm Ali’nin babası mezbûr Budak, babam merkūm Ahmed ile li ebeveyn karındaşlar olmağın mezbûrân Hasan ve Ramazan ammim merkūm Budak’ın oğlu Ali’nin sulbî oğulları olmağla verâsetim usûbet-i nesebiyye cihetinden mezbûrâna münhasıradır deyû bi tav‘ihî ikrâr ve i‘tirâf edip musırran vefât eyledi bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde gıbbe ri‘âyetihî şerâiti’l-kabûl şehâdetleri makbûle olmağın mûcebiyle hükm birle mâ hüve’l-vâki‘ ketb olundu. Fi’l-yevmi’l-hâmis min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Hüseyin Kethüdâ b. ( ), Behram Bey b. ( ), Mehmed b. ( ), Bilâl b. Ali, Mustafa b. Ahmed, Ali b. Mustafa.