Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 355 Hüküm no: 447 Orijinal metin no: [73b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Dimo’nun evini istiğlâl yoluyla Cafer Paşa Vakfı’na sattığı Mahmiye-i Kostantıniyye mahallâtından Mustafa Paşa mahallesinde sâkin olan Todori v. Dimo nâm zimmî, meclis-i şer‘-i şerîfde hâzır olup âtiyyü’z-zikr menzilini merhûm Cafer Paşa vakfı’na mütevellî olan hâmil-i hâze’l-kitâb Mehmed Beşe b. Hamza’ya bey‘ ettiğini ikrâr ve i‘tirâf etti. Mütevellî-i mezbûr da vakf-ı merkūm malıyla ve istiğlâl maksadıyla, bâyi‘-i mezbûrun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede vâki‘ olan, bir tarafdan merhûm Ferruh Kethüdâ vakfı, diğer tarafdan Kurista bt. Nikola mülkü, öteki tarafdan Todori v. Dimo mülkü ve diğer tarafdan da tarîk-i âm ile mahdûd bulunan cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt dokuz bin akçe semen-i mu‘ayyen-i makbûzla iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına dört bin elli akçe ücret ile menzili kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra Tanrıvermiş v. Yasef ve Yorgi v. Apostol ve mukırr-ı mezbûrenin zevcesi Tomani bt. Yorgi nâm zimmîlerin her biri menzil-i mezbûrun derkine ücret-i merkūmeye ve asl-ı meblağ-ı mezbûra îcâb ve kabûlü hâvî kefâletle kefîl oldu. Cerâ zâlike ve hurrire fî gurreti şehri Zilka‘de eş-şerîfe sene seb‘a ve erba‘în ve elf. Şuhûdü’l-hâl: Sâlih Efendi b. İmâm, Ömer Halîfe b. Müezzin, Yakub b. Kurd, Mustafa b. Veli, Mustafa b. Ahmed, Mahmud b. Ahmed, Mustafa b. Ali