Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 355 Hüküm no: 448 Orijinal metin no: [73b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Beşe b. Mehmed’in alacağının kefil Yorgi v. İstati’den tahsil edilmesi Zümre-i râcilînden Yahya Beşe b. Mehmed nâm kimesne meclis-i şer‘de Yorgi v. İstati nâm zimmîyi ihzâr ve mahzarında üzerine takrîr-i da‘vâ edip vilâyet-i Rumeli’nde Gerbeniş kazâsına tâbi‘ Zoguryani nâm karye sâkinlerinden olup bundan akdem hâlik olan Kiryazi zimmetinde karz-ı şer‘îden iki bin üç yüz akçe hakkıma mezbûr Yorgi tarafından emr ve kabûlü hâviye kefâletle kefîl bi’l-mâl olmuşidi suâl olunup alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûr Yahya Beşe’den müdde‘âsına mutâbıka beyyine taleb olundukda, Hristo v. Rizo ve Mavridi v. Manol nâm zimmîler meclis-i şer‘a li ecli’ş-şehâde hâzırân olup istişhâd olunduklarında, her biri edâ-i şehâdet-i şer‘iyye edip fi’l-vâki‘ müdde‘î-i mezbûr Yahya Beşe’nin hâlik-i mezbûr Kiryazi zimmetinde olan iki bin üç yüz akçe hakkına mezbûr Yorgi bizim huzûrumuzda kefîl bi’l-mâl olmuşidi biz bu husûsa şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle olmağın meblağ-ı mezbûrun edâsına tenbîh birle mâ vaka‘a gıbbe’t-taleb ketb olundu. Fi’l-yevmi’r-râbi‘ min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mahmud b. Ahmed, Mustafa b. Veli, Yakub b. Kurd, Mustafa b. Ahmed, Ali b. Abdullah.