Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 357 Hüküm no: 451 Orijinal metin no: [73b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Şermo’nun menzil, bağ ve tarlalarını Yano v. Nikola’ya sattığı Havâss-ı Refî‘a kazâsı müzâfâtından Küçükköy demekle ma‘rûfe olan karye sâkinlerinden Dimo v. Şermo nâm zimmî mahfil-i kazâda işbu râfi‘atü’l-kitâb Yano v. Nikola nâm zimmî muvâcehesinde bi’t-tav‘i’s-sâf ikrâr ve i‘tirâf edip vilâyet-i Rumeli’nde Avlonya sancağında Poganiye kazâsına tâbi‘ Mesarya nâm karyede vâki‘ bir tarafı Aleksi mülkü [ve bir tarafı] Kondo mülkü ve bir tarafı Dodo mülkü ve bir taraf-ı tarîk-i âm ile mahdûd üç bâb fevkānî odaları ve sofayı ve fırını ve tahtânî iki bâb odayı ve muhavvatayı müştemil mülk menzilimi ve karye-i mezbûre kurbunda vâki‘ ma‘lûmü’l-hudûd iki kıt‘a mülk bağlarımı mezbûr Yano’ya tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bin beş yüz nakd-i râyic fi’l-vakt fıddî akçeye bey‘ edip ol dahi iştirâ ve kabûl eyledikden sonra yine karye-i mezbûre arâzisinde mevâzi‘-i müteferrikada vâki‘ ma‘lûmü’l-hudûd yirmi iki kıt‘a tarlalarımın dahi hakk-ı tasarrufunu sâhib-i arz ma‘rifetiyle beş yüz mezbûrü’n-na‘t akçe mukābelesinde tefvîz edip ol dahi tefevvuz ve kabûl eyledikden sonra meblağ-ı mezbûr iki bin akçeyi yedinden bi’t-tamâm ve’l-kemâl ahz ve kabz eyleyip emlâk-i mezbûreyi mahallinde [74a] kabz ve tesellüme ve mezâri‘-i mezbûreyi tasarrufa merkūm Yano’yu taslît eyledim dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fi’l-yevmi’s-sâlis min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Receb Efendi b. Abd[i], Mustafa b. Ahmed, Ali b. Mustafa, Yorgi v. Yani, Yorgi v. Dimo, Anastaş v. Yorgi, Dodo v. Kika.