Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 358 Hüküm no: 453 Orijinal metin no: [74a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. İshak’ın varislerinin sulh olduğu Mahmiye-i Havâss-ı Aliyye kazâsı müzâfâtından Küçükçekmece nâhiyesine tâbi‘ Ayastefanos nâm karyede sâkin iken bundan akdem müteveffât olan Fâtıma bt. İshak nâm hâtunun verâseti zevc-i metrûkü Mehmed b. Abdullah ve li ebeveyn karındaşı Durmuş Bey’e ve li ebeveyn kız karındaşları Ümmühâni ve Emine’ye münhasıra olduğu şer‘an mütebeyyin oldukdan sonra mezbûr Mehmed mahfil-i kazâda ikrâr-ı âti’z-zikri tasdîka kendi tarafından asıl ve merkūmetân Ümmühâni ve Emine taraflarından hasm-ı şer‘î câhid mahzarında nehc-i şer‘î üzre sâbitü’l-vekâle vekîl olup müteveffât-ı mezbûrenin muhallefâtına vâzı‘ü’l-yed olan mezbûr Durmuş Bey mahzarında ikrâr ve takrîr-i kelâm edip zevcem müteveffât-ı mezbûr[e] Fâtıma’nın muhallefâtından bana isâbet eden nısf hisse-i şer‘iyyem mukābelesinde, mezbûr Durmuş Bey ve karındaşları ile şerâit-i sıhhat-i sulhü hâvî mevâni‘den ârî ve tehârüc-i şer‘î tarîkiyle nakd-i râyic fi’l-vakt iki bin üç yüz akçe üzerine sulh olup bedel-i sulh olan meblağ-ı mezbûr iki bin üç yüz akçeyi tamâmen mezbûr Durmuş Bey yedinden ahz ve kabz edip ve zimmetlerini husûs-ı mezbûra müte‘allik cemî‘ de‘âvîden ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâdî aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mustafa b. Ahmed, Ali Çelebi b. ( ), Ali b. Mustafa, Mehmed b. Rıdvan, Hasan Kethüdâ, Mahmud b. Ahmed, Mustafa [b.] Veli ve gayruhüm.