Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 358 Hüküm no: 454 Orijinal metin no: [74a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Hızır’ın terekesinin varislerince teslim alındığı Medîne-i Hazret-i Ebî Eyyûb el-Ensârî mahallâtından Ali Paşa-yı Cedîd mahallesinde sâkin iken bundan akdem müteveffâ olan İbrahim b. Hızır nâm sagīrin verâseti li üm er karındaşı Mehmed b. Mustafa nâm sagīre ve li eb kebîre kız karındaşı Fâtıma’ya ve babasının vâlidesi olup cedde-i sahîhası olan Zülfi bt. Elvan nâm hâtuna münhasıra olduğu şer‘an mütebeyyin oldukdan sonra mezbûre Zülfi asâleten ve sagīr-i mezbûr Mehmed’in babası Mustafa Paşa velâyeten mezbûre Fâtıma tarafından dahi husûs-ı âti’z-zikre vekîl olup hasm-ı şer‘î câhid mahzarında mezbûre Fâtıma’yı ma‘rifet-i şer‘iyye ile ârifeyn olan Mahmud Çavuş b. Mehmed ve Mustafa b. Mehmed şehâdetleri ile şer‘an vekâleti sâbite olan Mehmed b. Yusuf vekâleten mahfil-i kazâda müteveffâ-yı mezbûr İbrahim’in tesviye-i umûruna kıbel-i şer‘den mansûb vasîsi ve terekesine vâzı‘ü’l-yed olan işbu hâmilü’l-kitâb Mehmed Beşe b. Murad mahzarında her biri ikrâr ve takrîr-i kelâm edip mûrisimiz müteveffâ-yı mezbûr İbrahim’in vasîsi merkūm Mehmed Beşe yedinde mahfûz olup bi hasebi’l-irsi’ş-şer‘î bize intikāl eden iki bin iki yüz yetmiş akçeden müteveffâ-yı mezbûrun techîz ve tekfînine dokuz on akçe harc ve sarf olunup bâkī bin üç yüz altmış akçeyi merkūm Mehmed Beşe yedinden bi’t-tamâm ve’l-kemâl ahz ve kabz edip beynimizde bi hasebi’ş-şer‘ iktisâm eyledik. Müteveffâ-yı mezbûrun malından merkūm Mehmed Beşe zimmetinde bir akçe ve bir habbe bâkī kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Derviş b. Haydar, Yusuf Çelebi b. Mahmud, Mehmed b. Zülfikār, Derviş Çelebi b. Osman, Osman [b.] Abdullah, Yakub b. Kurd, Ali b. Mustafa, Mustafa b. Veli.