Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 359 Hüküm no: 455 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pagona ve Zafire bt. Preşkova’nın menzilini Andriye v. Yani’ye satmaları Allahü hasbî ve aleyhi ittikâlî Vaka‘a’l-bidâyetü bi kaydi’l-vekāyi‘ min hâzihi’s-sahîfeti fî nevbeti’l-abdi’l-fakīr ileyhi sübhânehû Abdülkādir el-müvellâ hilâfeten bi’l-Havâssi’l-aliyyi hamâllâhu ehlehâ ani’l-beliyye âmîn, bi hurmeti’n-nebiyyi’l-emîn aleyhi ve alâ âlihi’s-salâtü ve’s-selâm. Mâ şedde fî gazvi’l-adüvvi izâm. Havâss-ı Aliyye kazâsı müzâfâtından Cuhûd Burgaz nâm karye sâkinlerinden Pagona ve Zafire bt. Preşkova nâm Nasrâniyeler mahfil-i kazâda işbu hâmilü’s-sifr Andriye v. Yani nâm zimmî muvâcehesinde bi tav‘ihâ ikrâr ve i‘tirâf edip karye-i mezbûrede vâki‘ bir tarafdan Saltan bt. Dimitri mülkü ve iki tarafdan Aleksi v. Andriye mülkü ve bir tarafdan tarîk-i âm ile mahdûd iki bâb tahtânî beyti ve muhavvata-i zât-ı eşcâr-ı müsmire ve gayr-ı müsmireyi müştemil ale’l-iştirâki’s-seviy mülkümüz olan menzili, cümle tevâbi‘ ve levâhıkı ile mezbûr Andriye’ye fıddî nakd-i râyic fi’l-vakt dört bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semen-i mezbûr dört bin beş yüz akçeyi bi’t-tamâm ve’l-kemâl mezbûr Andriye yedinden ahz ve kabz eyledik. Ba‘de’l-yevm zikr olunan menzil-i mezbûr Andriye’nin mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Murad b. Abdullah, Mehmed b. Abdullah, Ali b. Mustafa, Mustafa b. Ahmed, Preşkova v. Nikilob?, Hristo [v.] Mihal ve Karriko? [v.] Miyo.