Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 360 Hüküm no: 456 Orijinal metin no: [74b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Oruc b. Mustafa’nın tarlasını Mehmed b. Hüseyin’e sattığı Vilâyet-i Rumeli’nde İstarova kazâsına tâbi‘ Harosko nâm karye sâkinlerinden Oruc b. Mustafa nâm kimesne mahfil-i kazâda işbu hâmilü’l-kitâb Mehmed b. Hüseyin nâm kimesne mahzarında bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafdan Hasan Beşe b. Hüseyin tarlası ve bir tarafdan İbrahim Beşe b. Mehmed tarlası ve bir tarafdan mezbûr Mehmed tarlası ve bir tarafdan arz-ı hâliye ile mahdûd taht-ı tasarrufumda olup tahmînen iki keyl tohum istî‘âb eder iki dönüm bir kıt‘a tarlamın hakk-ı tasarrufunu, sâhib-i arz ma‘rifetiyle mezbûr Mehmed’e altı yüz akçe mukābelesinde tefvîz edip ol dahi minvâl-i meşrûh üzre tefevvuz ve kabûl eyledikden sonra bedel-i tefvîz olan meblağ-ı mezbûr altı yüz akçeyi bi’t-tamâm ve’l-kemâl ahz ve kabz edip zikr olunan tarlayı mahallinde zabt ve tasarrufa mezbûr Mehmed’i taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâmin min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Bayram b. Hasan, Mehmed b. Ali, Hüseyin b. Ali, Mustafa b. Hasan, Ali b. Mustafa, Mustafa b. Ahmed, Yakub b. Kurd.