Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 360 Hüküm no: 457 Orijinal metin no: [74b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hatun bt. Abdurrahman’ın evini Bedriye Hatun bt. Mustafa Efendi’ye sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Uluca Baba mahallesinde sâkine olan Hatice Hâtun bt. Abdurrahman nâm hâtun meclis-i şerî‘at-i şerîfe-i garrâ ve mahfil-i tarîkat-i refî‘a-i zehrâda hâzıre olup âtiyyü’z-zikr menzilini, hâmile-i hâze’l-kitâb Bedriye Hâtun bt. Mustafa Efendi’ye bey‘-i bâtt-ı sahîh ile bey‘ ettiğini ikrâr ve i‘tirâf etti. Müşteriyye-i mezbûre de kendi malı ile ve kendisi için, bâyi‘-i merkūmenin işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede vâki‘, bir tarafdan Zigerci?-zâde Mehmed Çelebi mülkü, diğer tarafdan Ulûfecizâde Mehmed Çelebi vakfı, iki tarafdan da tarîk-i hâs ve âm ile mahdûd bulunan fevkānî bir beyti, tahtânî dört beyti, kasrı, zulleyi, fırını, bi’r-i mâyı, helâyı ve eşcâr-ı müsmire ve gayr-ı müsmireli bahçeyi müştemil olan cemî‘-i menzili cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt otuz bin akçe semen-i mu‘ayyen-i makbûz ile iştirâ etti. Îcâb ve kabûl ve teslîm tesellümle akid tamâm oldu. Müşteriyye-i mezbûre kıbelinden ikrâr-ı mârrü’z-zikri tasdîka vekâleti, mezbûreyi ma‘rifet-i şer‘iyye ile tanıyan Hasan b. Hüdâverdi ve Ömer b. Musa nâm kimesnelerin şehâdetleri ile sâbit olan Seyyid Mehmed Efendi vâki‘ ikrârı tasdîk etti. Cerâ zâlike ve hurrire fi’l-yevmi’t-tâsi‘ min Zilka‘de eş-şerîfe sene seb‘a ve erba‘în ve elf. Şuhûdü’l-hâl: İmâm Mahmud Efendi b. Mehmed, Mehmed b. Veli, Kasım Çelebi b. Sinan, Mustafa Dede b. Bestan, Hasan Beşe b. Ali, Seyyid Mehmed Çelebi b. ( ), Muhzır Yakub Çelebi, Muhzır Ali b. Mustafa ve gayruhüm