Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 365 Hüküm no: 466 Orijinal metin no: [75b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Efendi b. Yusuf’un menzilini Hüseyin Beşe’ye bey‘ bi’l-vefâ yoluyla sattığı Vilâyet-i Rumeli’nde Arnavud Belgradı kazâsına tâbi‘ İsfere nâm karye sükkânından Hasan Efendi b. Yusuf mahfil-i kazâda bir tarafı mezbûr Hüseyin Beşe mülkü ve bir tarafı Hasan b. Hacı mülkü ve bir tarafı diğer Hasan b. Abdullah mülkü ve bir tarafı tarîk-i âm ile mahdûd iki bâb fevkānî ve iki bâb tahtânî odalarını ve yine cüneynede mübteniye iki bâb tahtânî odaları müştemil çiftlik ta‘bîr olunur mülk menzilimi, cümle tevâbi‘ ve levâhıkı ile mezbûr Hüseyin Beşe’ye sekiz bin nakd-i râyic fi’l-vakt fıddî akçeye bey‘ bi’l-vefâ tarîki üzre bey‘ edip ol dahi vech-i muharrer üzre iştirâ ve kabûl eyledikden sonra meblağ-ı mezbûr sekiz bin üç yüz akçeyi bi’t-tamâm yedinden ahz ve kabz edip mebî‘-i mezbûru mahallinde mezbûr Hüseyin Beşe’yi kabz ve tesellüme taslît eyleyip ve meblağ-ı mezbûru târih-i kitâb gurresinden bir sene tamâmına değin mezbûr Hüseyin Beşe’ye edâ eylemezsem bey‘-i mezbûr bâtta münkalib olup merkūm Hüseyin Beşe’nin mülkü olmak üzre müvâ‘ade eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Çavuş b. Abdullah, Ahmed b. Ömer, Ali b. Abdullah, Ali b. Ahmed, Hasan b. Süleyman, Yakub b. Kurd, Mustafa b. Ahmed ve gayruhüm.