Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 366 Hüküm no: 467 Orijinal metin no: [75b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Mehmed’in ortağı Yusuf Beşe b. Hüseyin’e olan borcuna süre verilmesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Kızıl Mescid mahallesinde sâkin olup eyâlet-i Anadolu’da vâki‘ kıbtiyân tâifesinin bin kırk yedi senesi için üzerlerine lâzım gelen cizyelerini cem‘a memûr olan kıdvetü’l-emâsil ve’l-akrân Ali b. Mehmed nâm cündî mahfil-i kazâda Yusuf Beşe b. Hüseyin nâm râcil mahzarında takrîr-i kelâm [76a] edip mezbûr Yusuf Beşe ile cizye-i mezbûreyi ber vech-i iştirâk cem‘ine mübâşeret edip cem‘ üzre iken beynimizde nice ahz ve i‘tâ olunmuş idi hâlâ mezbûr Yusuf Beşe benden müfârakat edip hesâblaşdığımızda deyn-i şer‘îden ba‘de küll-i hesâb mezbûr [Yusuf] Beşe’nin benim zimmetimde edâsı lâzım yirmi altı bin beş yüz akçe hakkı kalmışdır deyû ikrâr ve i‘tirâf ettiğinde el-mukarru lehü’l-merkūm bi’l-muvâcehe tasdîkden sonra meblağ-ı mezbûrun edâsiyçün târih-i kitâbdan kırk gün tamâmına imhâl etmeğin mâ vaka‘a bi’t-taleb ketb olundu. Tahrîren fi’l-yevmi’s-sânî aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: İbrahim Bey b. ( ) el-Cündî, Mustafa Bey b. Mehmed, Mehmed b. Rıdvan, İbrahim Çelebi b. Mustafa, Mustafa b. Ahmed, Yakub b. Kurd ve gayruhüm.