Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 366 Hüküm no: 468 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nasuh Bey b. Abdullah’ın menzilini Hüseyin b. Abdullah’a sattığı Havâss-ı Aliyye kazâsı müzâfâtından Terkos nâhiyesine tâbi‘ Hacı Mihaliç nâm karye sâkinlerinden Nasuh Bey b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Hüseyin b. Abdullah mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Mehmed Beşe b. Veli mülkü ve bir tarafdan mezbûr Hüseyin mülkü ve iki tarafdan tarîk-i âm ile mahdûd iki bâb tahtânî beyti ve sofayı ve fırını ve zât eşcâr-ı müsmire ve gayr-ı müsmire muhavvatayı müştemil mülk menzilimi, cümle tevâbi‘ ve levâhıkı ile mezbûr Hüseyin’e fıddî nakid ve râyic fi’l-vakt dört bin iki yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ettikden sonra semen-i mezbûr dört bin iki yüz akçeyi bi’t-tamâm ve’l-kemâl mezbûr Hüseyin yedinden alıp kabz eyledim ba‘de’l-yevm zikr olunan menzil-i merkūm Hüseyin’in mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırr-ı mezbûr Nasuh Bey’in minvâl-i meşrûh üzre cârî olan ikrâr-ı meşrûhunda el-mukarru lehü’l-merkūm Hüseyin bi’l-muvâcehe tasdîk etmeğin mâ vaka‘a bi’t-taleb ketb olundu. Tahrîren fi’l-yevmi’s-sânî aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Kaya Bey b. Hüseyin, Durak b. Osman, Mehmed b. Veli, Yusuf Beşe b. Mehmed, Süleyman b. Hasan, Kenan b. Abdullah, Mahmud b. Abdullah, Yakub b. Kurt, Mahmud b. Ahmed, Ali b. Mustafa ve g[ayruhum].