Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 370 Hüküm no: 475 Orijinal metin no: [76b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Derviş Paşa’nın menzilini, vakıf bostan ve tarlalarını Perviz Kethüda b. Abdullah’a sattığı Mahmiye-i İstanbul’da Atmeydanı kurbunda sâkine fahrü’l-muhadderât zahrü’l-muvakkarât Fâtıma bt. el-merhûm Derviş Paşa tarafından husûs-ı âti’z-zikre vekîl olup hasm-ı câhid mahzarında müşârün-ileyhâyı ma‘rifet-i şer‘iyye ile ârifeyn olan Yusuf Bey b. Abdullah ve Haydar b. Abdullah şehâdetleri ile şer‘an vekâleti sâbite olan dergâh-ı âlî müteferrikalarından kıdvetü’l-emâsil ve’l-a‘yân Ali Ağa b. el-merhûm Mustafa Paşa mahfil-i kazâda işbu sâhibü’l-kitâb Perviz Kethüdâ b. Abdullah mahzarında bi’l-vekâle ikrâr ve i‘tirâf edip müvekkile-i mezbûrenin Havâss-ı Refî‘a kazâsı müzâfâtından [77a] Soğanlı köyü demekle ma‘rûfe olan karyede vâki‘ bir tarafı yine müvekkile-i müşârün-ileyhâ mutasarrıfe olduğu vakıf bostan ve bir tarafı Çâşnigir Yusuf Ağa mülkü ve iki tarafı tarîk-i âm ile mahdûd olup iki bâb fevkānî odaları ve iki ahırı ve fırını ve bi’r-i mâyı ve kenîfi ve cüneyne-i zât-ı eşcâr-ı müsmire ve gayr-ı müsmireyi müştemil olan mülk menzilini, cümle tevâbi‘ ve levâhıkı ile on bir bin beş yüz nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Perviz Kethüdâ’ya vekâleten bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra merhûm ve mağfûrun-leh Sultan Bayezid Hân -tâbe serâhû- evkāfı arâzisinden olup bâlâda zikr olunan bostanın menzil-i mezbûra muttasıl olan tarafından bennâ zirâ‘ı ile tûlen yedi zirâ‘ ve arzen dört zirâ‘ bi hesâb-ı şatrancî yirmi sekiz zirâ‘ bostan ile karye-i mezbûre kurbunda vâki‘ bir tarafı Paşa Hâtun tarlası ve bir tarafı Sipâhi Mustafa tarlasının dahi hakk-ı tasarrufunu, evkāf-ı mezbûre mütevellîsi ma‘rifetiyle bin beş yüz mezbûrü’n-na‘t akçe mukābelesinde yine merkūm Perviz Kethüdâ’ya vekâleten tefvîz edip ol dahi tefevvuz ve kabûl eylemeğin mukābele-i tevfîzde olan bin beş yüz akçe ile menzil-i mezbûrun semeni olan on bir bin beş yüz akçe ki cem‘an on üç bin akçeyi vekâletim hasebiyle yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûr merkūm Perviz Kethüdâ’nın mülk-i müşterâsı ve sâlifü’z-zikr tarla ve bostan dâhil-i taht-ı tasarrufu olmuşdur dedikde vekîl-i mezbûr Ali Ağa minvâl-i muharrer üzre cârî olan ikrâr ve i‘tirâfını el-mukarru lehü’l-merkūm Perviz Kethüdâ vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’l-hâdî aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Hasan Beşe b. ( ) er-Râcil, Murad b. Abdullah, Haydar b. Abdullah, Mehmed b. Ali, Ali b. Mustafa, Mustafa b. Veli, Mahmud b. Ahmed.