Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 371 Hüküm no: 476 Orijinal metin no: [77a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Yorgo’nun, Dimitri v. Todoraki ve Yani v. Yorgo’ya borcu olduğu Vilâyet-i Rumeli’nde Ermiye kazâsına tâbi‘ Kilirye nâm karye kethüdâsı olan Apostol v. Yorgo nâm zimmîler mahfil-i kazâda işbu bâ‘isü’l-kitâb Dimitri v. Todoraki ve Yani v. Yorgo nâm zimmîler muvâcehelerinde her biri ikrâr ve i‘tirâf edip mezbûrân Dimitri ve Yani’den ale’l-iştirâki’s-seviy yirmi sekiz bin nakd-i râyic fi’l-vakt fıddî akçe istikrâz eylediğimizde mezbûrlar dahi beynlerinde müşterek oldukları maldan ikrâz ve teslîm edip biz dahi ikrâz ve kabz eylemişdik hâlâ meblağ-ı mezbûr yirmi sekiz bin akçe mezbûrâna zimmetimde lâzımü’l-edâ ve vâcibü’l-kazâ deynimdir dediklerinde mukırrân-ı mezbûrânın vech-i muharrer üzre cârî ve sâdır olan ikrâr ve i‘tirâfını mezbûrân Dimitri ve Yani vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sânî aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mahmud Çavuş b. Mehmed, Mehmed b. Yusuf, İbrahim Beşe b. Sefer, Durmuş b. İshak, Mustafa b. Abdullah, Mustafa b. Mehmed, Mahmud b. Ahmed, Mustafa b. Ahmed.