Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 372 Hüküm no: 477 Orijinal metin no: [77a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kokana bt. Kiti’nin dükkan hissesini Nikola v. İstati ve Kiro v. Dido’ya sattığı Mahmiye-i Kostantıniyye hısnı ebvâbından Topkapısı dâhilinde sâkine Kokana bt. Kiti nâm Nasrâniye tarafından tevfîz-i âti’z-zikri ikrâra vekîl olup vekâleti Angeli v. Filo ve Papa Dimitri şehâdetleriyle şer‘an vekâleti sâbite olan Andriye v. Kiryaki nâm zimmî mahfil-i kazâda işbu râfi‘ânü’s-sifr Nikola v. İstati ve Kiro v. Dido nâm zimmîler muvâcehelerinde bi’l-vekâle ikrâr ve takrîr-i kelâm edip mahmiye-i mezbûre ebvâbından Yenikapı hâricinde Taşlık nâm mevzi‘de vâki‘ bir tarafdan Yani nâm zimmî dükkânı ve bir tarafdan Lefteri v. Kiro dükkânı ve bir tarafdan Maçarez v. İstiko dükkânı ve bir tarafdan tarîk-i âm ile mahdûd merhûm es-Sultan Bayezid Hân vakfı’ndan olup icâre-i mu‘accele ile müvekkilemin tasarrufunda olan nısf dükkânı, müvekkilem mezbûre Kokana vakf-ı mezbûr mütevellîsi ma‘rifetiyle iki bin beş yüz akçe bedel mukābelesinde mezbûrân Nikola ve Kiro’ya tefvîz edip onlar dahi vech-i meşrûh üzre tefevvuz ve kabûl eyledikden sonra bedel-i tefvîz olan meblağ-ı mezbûr iki bin beş yüz akçeyi tamâmen mezbûrân Nikola ve Kiro yedlerinden alıp kabz eyledi dedikde vekîl-i mezbûr Andriye’nin minvâl-i muharrer üzre cârî olan ikrârını mezbûrân Nikola ve Kiro bi’l-muvâcehe tasdîk etmeğin mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Mahmud b. Ahmed, Mustafa b. Mahmud, Mustafa b. Veli, Ali b. Mustafa, Dimo v. Kiro, Şimo v. ( ), Duka [v.] Niko ve gayruhüm.