Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 373 Hüküm no: 479 Orijinal metin no: [77b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Mustafa’yı darb eden kişinin Mustafa b. Abdullah olduğu Hâssa suyolcu nâzırı olan umdetü’l-emâsil ve’l-emâcid, câmi‘ü’l-mekârim ve’l-mehâmid Hasan Ağa tarafından Mehmed Bey b. Yusuf nâm kimesne mahfil-i kazâya gelip takrîr-i kelâm edip mezbûr Hasan Ağa târih-i kitâbdan üç gün mukaddem suyolcularından Hüseyin b. Mustafa nâm kimesneyi Havâss-ı Aliyye kazâsına tâbi‘ Küçükköy demekle ma‘rûfe olan karyeye ba‘zı husûs için irsâl eylemişidi mezbûr Hüseyin varıp birkaç yerinde kara bere alâmeti ile gelip sâhib-i firâş olmuşdur hâlâ cânib-i şer‘den üzerine varılıp keşf tahrîr olunmasın iltimâs ettikde cânib-i şer‘den mevlânâ Mustafa irsâl olunup ol dahi zeyl-i kitâbda mastûrü’l-esâmî olan müslimîn ile medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Bıçakçı Ferhad mahallesinde vâki‘ mezbûr Hüseyin’in menziline vardıklarında mezbûr Hüseyin sâhib-i firâş olup başının sol tarafında ve sol böğründe kara bere alâmeti olduğunu müşâhede ve mu‘âyene edip mezbûr Hüseyin’i istintâk eylediklerinde cevâbında, mezbûr Hasan Ağa beni karye-i mezbûreye gönderdikde ben dahi varıp gelir iken yolda Sırıklıçayırı nâm mevzi‘de mîrî sağancılar mandırası bölük başısı olan Mustafa b. Abdullah nâm kimesneye rast gelip beni bi gayrı vechin başımın sol yanına ve sol böğrümde taş ile urup kara bere eylemişdir ol darbdan sâhib-i firâş oldum dediğini hıfzan li’l-makāl mevlânâ-yı mezbûr mahallinde tahrîr, ba‘de[hû] gelip meclis-i şer‘de inhâ ve takrîr etmeğin mâ hüve’l-vâki‘ ketb ve imlâ olundu. Tahrîren fi’l-yevmi’r-râbi‘ ve aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: El-Hâc İbrahim Beşe Ser-bölük, Süleyman b. el-Hâc Bayram, Rıdvan b. Abdullah, Receb b. Abdullah, Mehmed Bey ve gayruhüm.