Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 373 Hüküm no: 480 Orijinal metin no: [77b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zoto v. Yani’nin bağını Hristo v. Apostol’e sattığı Vilâyet-i Rumeli’nde Delvine kazâsına tâbi‘ Tarakat nâm karye sâkinlerinden Zoto v. Yani nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Hristo v. Apostol nâm zimmî mahzarında bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafdan Yani v. Zoto bağı ve bir tarafdan Mosko v. Yani bağı ve bir tarafdan Dimo v. Niko bağı ve bir tarafdan arz-ı hâliye ile mahdûd bir dönüm mülk bağımı mezbûr Hristo’ya fıddî nakd-i râyic fi’l-vakt yedi yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr yedi yüz akçeyi bi’t-tamâm ve’l-kemâl mezbûr Hristo yedinden ahz ve kabz edip mebî‘-i mezbûru mahallinde zabt ve tasarrufa mezbûr Hristo’yu taslît eyledim ba‘de’l-yevm zikr olunan bağ-ı mezbûr Hristo’nun mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mustafa b. Ahmed, Ali b. Mustafa, Receb Efendi b. Abdi, Paskal v. Yani, Zafir v. Yani, Hristo v. Apostol, Yani v. Zoto, Yani v. Niko, Papa Yorgi, Foti v. Hristo, Zoto, Piyer v. Lazo, Yani v. Niko, Zoto v. Niko ve gayruhüm.