Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 381 Hüküm no: 490 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Yusuf b. Hasan’ın Mehmed Dede b. Hacı Hasan’dan koyun aldığı Mahrûse-i Selânik müzâfâtından Avrathisarı nâhiyesine tâbi‘ Ereğli nâm karye sâkinlerinden işbu bâ‘isü’l-kitâb Mehmed Dede b. el-Hâc Hasan nâm kimesne mahfil-i kazâda el-Hâc Yusuf b. Hasan muvâcehesinde üzerine takrîr-i da‘vâ edip mezbûr el-Hâc Yusuf’a târih-i kitâbdan bir sene mukaddem Havâss-ı Aliyye kazâsının mîrî saya kurbunda Beylik Keçesi? nâm mevzi‘de her biri yüz kırkar akçeye olmak üzre dört yüz on iki re’s koyunu bâtten bey‘ ve teslîm edip ol dahi iştirâ ve tesellüm eylemişidi hâlâ hesâb-ı mezbûr üzre semenleri olan altı yedi bin altı yüz seksen akçe hakkımı taleb ederim suâl olunsun dedikde gıbbe’s-suâl mezbûr el-Hâc Yusuf müdde‘î-i mezbûr Mehmed Dede’den târih-i mezbûrda ber vech-i şirâ tarîki ile ancak iki yüz re’s koyun alıp semeni dahi zikr olunmamışdır deyû cevâb vermeğin vâki‘ hâl hıfzan li’l-makāl gıbbe’t-taleb ketb olundu. Hurrire fî evâhiri şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Abdülkādir, Mahmud b. Ahmed, Hüseyin b. Mehmed Beşe, Abdi Beşe, Mustafa Beşe, Ali Beşe, Mustafa Beşe, Mustafa çukadâr ve gayruhüm.