Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 382 Hüküm no: 491 Orijinal metin no: [79b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Refia Hatun bt. Esad Efendi’nin Saime Hatun bt. Hoca İlyas’dan aldığı arsa üzerine bina yapımına izin verildiği Mahmiye-i İstanbul’da Gedik Paşa mahallesinde sâkine fahrü’l-muhadderât Sâime Hâtun bt. Hoca İlyas tarafından arsa-i âtiyetü’z-zikri tefvîz ve bedelini ahz ve kabz ve kendiye îsâle vekîl olup hasm-ı câhid mahzarında mezbûreyi ta‘rîf-i şer‘iyye ile ârifeyn olan Mehmed Bey b. Resûl ve Yusuf Bey b. Abdullah şehâdetleri ile şer‘an vekâleti sâbite olan zevci fahrü’l-a‘yân Rıdvan Bey b. Abdullah mahfil-i kazâda işbu râfi‘atü’l-kitâb fahrü’l-muhadderâti’l-mükerreme, zahrü’l-muvakkarâti’l-mu‘atta[ra]? Refia Hâtun el-müvellâ’l-merhûm ed-dâricü ilâ medârici rahmetü Rabbihi’l-kayyûm Esad Efendi tarafından dahi arsa-i âtiyetü’l-beyânı tefvîz ve bedelini teslîme vekîl olup hasm-ı câhid mahzarında müşârün-ileyhâyı ma‘rifet-i şer‘iyye ile ârifeyn olan Mehmed Efendi b. ( ) ve Hasan Efendi b. Ali şehâdetleri ile vekâleti sâbite olan Osman Çavuş b. Yahya mahzarında bi’l-vekâle ikrâr ve takrîr-i kelâm edip Medîne-i hazret-i Ebî Eyyûb el-Ensârî -radiye anhu Rabbühü’l-Bârî-’de vâki‘ merhûm [ve] mağfûrun-leh Cezerî Kasım Paşa vakfı’ndan müvekkilem mezbûre Sâime Hâtun’un taht-ı tasarrufunda olup merkūm paşa-yı müşârün-ileyhe izâfet ile ma‘rûfe olan mahallede vâki‘ bir tarafı sâhil-i bahr ve iki tarafı Mustafa Ağa vakfı bir tarafı tarîk-i âm ile mahdûd senede üç yüz akçe taraf-ı vakfa mukāta‘ası olan arsanın tasarrufunu, vakf-ı mezbûra mütevellîsi olan Alemüddin Halîfe ma‘rifeti ile vekâlet-i mahkiyem hasebiyle mezbûr Osman Çavuş’a tefvîz edip ol dahi müvekkilesi mûmâ-ileyhâ [80a] Refia Hâtun için vekâleten tefvîz ve kabûl ettikden sonra mukābele-i tefvîzde yedinden elli altı bin nakd-i râyic fi’l-vakt fıddî akçe ahz ve kabz edip müvekkilem mezbûre Sâime Hâtun’a îsâl eyledim dedikde vekîl-i mezbûr Rıdvan Bey’in minvâl-i muharrer üzre sudûr eden ikrâr ve takrîrini vekîl-i âhar merkūm Osman Çavuş vicâhen tasdîk ve şifâhen tahkīk eyledikden sonra mütevellî-i merkūm Alemüddin Halîfe vekîl-i mezbûr Osman Çavuş mahzarında takrîr-i kelâm edip sâlifü’z-zikr arsanın üzerine kendi malı ile nefsi için müvekkilem mezbûre Refia Hâtun binâya izin taleb etmeğin ben dahi tevliyyetim hasebiyle kendi malı ile mülkü olmak üzre binâ ihdâsına izin verdim dedikde mâ vaka‘a bi’t-taleb ketb olundu. Hurrire fi’l-yevmi’l-hâmis aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Efendi b. ( ) el-Müderris, Hasan Efendi b. ( ), Receb Efendi b. Abdi, Hüseyin Bey, Hüseyin Bey, Hüseyin Çavuş, Abdülkādir el-M[uharrirü’l-] hurûf, Mehmed Çelebi b. ( ), Ahmed Beşe b. ( ), Ahmed Efendi ve gayruhüm.