Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 385 Hüküm no: 493 Orijinal metin no: [80b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pano v. Papa’nın bağ, ev ve tarlalarını Niko v. Minho’ya sattığı Vilâyet-i Rumeli’nde Premedi kazâsına tâbi‘ Laşbotça nâm karyede sâkin Pano v. Papa nâm zimmî meclis-i şer‘de Niko v. Minho nâm zimmî mahzarında bi’t-tav‘ ikrâr ve takrîr-i kelâm edip karye-i mezbûrede vâki‘ bir tarafı Kirko v. Zavpa ve bir tarafı Teyo v. Kirko ve bir tarafı Niko v. Minho ve bir tarafı tarîk-i âm ile mahdûd olup üç bâb tahtânî odayı ve önünde arsa-i hâliyeyi müştemil mülk menzil ile yine karye-i mezbûre kurbunda vâki‘ beyne’l-ahâlî Papa bağları demekle ma‘rûf tahdîdden müstağnî iki kıt‘a bağlar babam merkūm Papa’nın mülkü olup ba‘de helâkihî bana ve karındaşım ( ) intikāl edip ba‘dehû zikr olunan menzil ile iki kıt‘a bağları karındaşım mezbûr ile iktisâm edip her birinden nısf-ı mu‘ayyen ben ve nısf-ı âharın karındaşım mutasarrıf iken karındaşım dahi hâlik olup verâseti bana münhasıra olmağla zikr olunan menzilden ve bağlardan hisse-i mu‘ayyenesi dahi bana intikāl eylemiş idi hâlâ karındaşımdan intikāl eden vech-i meşrûh üzre nısf-ı mu‘ayyeni mezbûr Niko’ya hibe-i sahîh-i şer‘iyye ile hibe, ol dahi ittihâb ve kabûl edip mahallinde kabza taslît eyledim dedikde gıbbe’t-tasdîki’ş-şer‘î mezbûr Pano i‘âde-i kelâm edip yine karye-i mezbûre arâzisinden olup mevâzi‘-i müteferrikada vâki‘ inde’l-ahâlî her biri ma‘lûmü’l-hudûd olup tapu ile mutasarrıf olduğum yedi kıt‘a tarlalarımın dahi her birinin nısf-ı mu‘ayyenesinin hakk-ı tasarrufunu sâhib-i arz ma‘rifetiyle tefvîz eyleyip ol dahi vech-i muharrer üzre tefevvuz ve kabûl eylemeğin mâ vaka‘a gıbbe’t-taleb ketb olundu. Tahrîren fi’l-yevmi’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Rüstem Bey b. Abdullah el-Cündî, Ahmed Bey b. Süleyman, Hüseyin Beşe b. Abdullah, Hasan Beş b. Abdullah, Ahmed Beşe b. Abdullah, Fato v. Minho, Minho v. Deko, Tato v. Nako, Toto v. Duka, Kirko v. Kocko, Fota v. Kona, Kirko v. Yako, Teyo v. Çako, Deko v. Koko ve gayruhüm.