Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 385 Hüküm no: 494 Orijinal metin no: [80b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Kulu’nun ev hissesinden el çektirilerek hissenin Kika ve Dimo v. Siva isimli zimmilere verildiği Vilâyet-i Rumeli’nde Ergirikasrı kazâsına tâbi‘ Meşgolor nâm karye sâkinlerinden Kika ve Dimo veledey Siva nâm zimmîler meclis-i şer‘a karye-i mezbûre sâkinlerinden Papa Kulu nâm zimmîyi ihzâr ve mahzarında üzerine da‘vâ ve takrîr-i kelâm edip karye-i mezbûrede vâki‘ bir tarafdan Dimo mülkü ve bir tarafdan Doto v. Marko mülkü ve bir tarafdan diğer Dimo mülkü ve bir tarafdan tarîk-i âm ile mahdûd olup bir bâb tahtânî beyti ve eşcâr-ı müsmire ve gayr-ı müsmireyi müştemil menzil babam hâlik-i mezbûr Siva ile karındaşı Dimo’ya babaları Kiti’den irs-i şer‘î ile intikāl edip ba‘demâ babamız mezbûr Siva hâlik olup menzil-i mezbûrdan nısf hisse-i şâyi‘ası bi hasebi’l-irsi’ş-şer‘î ikimize intikāl etmeğin mezbûr Pa[pa]kulu bi gayr-ı vech-i şer‘î vaz‘-ı yed [81a] eder suâl olunup hisse-i mezbûremizden kasr-ı yedine tenbîh olunmak matlûbumdur dediklerinde gıbbe’s-suâl mezbûr Papa Kulu cevâbında, fi’l-vâki‘ menzil-i mezbûr müdde‘iyân-ı mezbûrân Kika ve Dimo’nun babaları hâlik-i mezbûr Siva ile karındaşı Dimo’ya babaları hâlik-i mezbûr Kiti’den bi hasebi’l-irsi’ş-şer‘î intikāl edip lâkin müdde‘iyân-ı mezbûrân Kika ve Dimo’nun babaları hâlik-i mezbûr Siva sıhhatinde menzil-i mezbûrdan hissesini karındaşı merkūm Dimo’ya bey‘ edip cümlesi mezbûr Dimo’nun mülkü oldukdan sonra menzil-i mezbûru benim karye-i mezbûrede vâki‘ ma‘lûmü’l-hudûd mülk menzilim mukābelesinde bi tarîki’l-mukāyaza bana bey‘ ve teslîm eylemişdi, mülk-i müşterâmdır dedikde gıbbe’l-istintâk müdde‘iyân-ı mezbûrân Kika ve Dimo’nun babaları hâlik-i mezbûr Siva menzil-i mezbûrdan hissesini karındaşı Dimo’ya bey‘ini münkirler olıcak merkūm Papa Kulu’dan müdde‘âsını mübeyyine beyyine taleb olundukda, ityân-ı beyyineden izhâr-ı kemâl-i acz etmeğin gıbbe’l-istihlâf mezbûrân Kika ve Dimo babaları hâlik-i merkūm sıhhatinde menzil-i merkūmdan hissesini karındaşı merkūm Dimo’ya bey‘ eylediğini bilmediklerine yemîn billâhi’llezî enzele’l-İncîle alâ İsa -a[leyhi’s-] s[elâm]- ettiklerinden sonra mezbûr Papa Kulu’nun menzil-i mezbûrun nısf-ı şâyi‘inden kasr-ı yedine tenbîh birle mâ vaka‘a bi’t-taleb ketb olundu. Tahrîren fi’l-yevmi’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Receb Efendi b. Abdi, Ali b. Mustafa, Yusuf b. Abdullah, Papa Nikola, Paro v. Kondi, Halo [v.] Kiryaki, Paho v. Niko, Niko [v.] Andriye, Tanaşi v. Kiryaki, Dido v. Dimo ve gayruhüm.