Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 391 Hüküm no: 502 Orijinal metin no: [82a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli b. Abdullah’ın bazı eşyalarını eşi Âişe bt. Hasan’a hibe ettiği Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Süleyman Çelebi mahallesinde sâkin Veli b. Abdullah nâm kimesne mahfil-i kazâda işbu râfi‘ü’l-kitâb zevcesi Âişe bt. Hasan nâm hâtun mahzarında ikrâr ve i‘tirâf edip zevcem mezbûre Âişe’ye silk-i mülkümden muntazam olan emlâkimden iki kıt‘a sarı köhne kebe ve bir beyaz müsta‘mel velense ve bir beledî köhne yorgan ve bir tencere ve bir sahan ve yirmi beş kıt‘a riyâlî guruş ve beynimizde ilm-i şer‘î ile ma‘lûm cümle esâs-ı beytimi hibe-i sahîha-i şer‘iyye ile hibe ve teslîm edip mezbûre Âişe dahi eşyâ-i merkūmeyi meclis-i hibede ittihâb ve tesellüm eyledi dedikde merkūm Veli’nin vech-i meşrûh üzre cârî ve sâdır olan ikrâr ve i‘tirâfını merkūm Âişe vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mahmud Efendi b. Mehmed el-İmâm, Veli b. İsa el-Müezzin, İbrahim b. Dursun, hallâc Şaban, Receb Efendi b. Abdi, Mahmud Hoca b. Ali, Ali b. ( ) ve gayruhüm.