Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 393 Hüküm no: 505 Orijinal metin no: [82b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri’nin varislerinden oğlu Yani’nin miras hisselerini kardeşleri Yorgi ve Nikola’ya sattığı Vilâyet-i Rumeli’nde Bogovina kazâsına tâbi‘ Tarsu nâm karye sâkinlerinden iken bundan akdem hâlik olan Dimitri nâm zimmînin verâseti sulbî oğulları Yani ve Yorgi ve Nikola nâm zimmîlere münhasıra olduğu şer‘an müte‘ayyin oldukdan sonra merkūm Yani mahfil-i kazâda işbu bâ‘isü’l-kitâb karındaşları mezbûrân Yorgi ve Nikola muvâcehelerinde ikrâr ve i‘tirâf edip babamız hâlik-i merkūmun karye-i mezbûrede vâki‘ bir tarafı Tohro tarlası ve bir tarafı İstemad tarlası ve bir tarafı Andriye Yazıcı mülkü ve bir tarafı dere hudûdu ile mahdûd olan menzilden ve yine karye-i mezbûre arâzisinde vâki‘ Tepe nâm mevzi‘de bir tarafı Ömer Çavuş mülkü ve bir tarafı Petro mülkü ve tarafeyn tarîk ile mahdûd olan menzilden ve ma‘lûmü’l-hudûd bir bâb samanlıkdan ve zikr olunan menzillerin etrâfında mağrûs olan iki yüz dip dut ağacından bi hasebi’l-irsi’ş-şer‘î bana intikāl eden sülüs hisse-i şâyi‘amı, safka-i vâhide ile mezbûrân Yorgi ve Nikola’ya beş bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip onlar dahi ale’l-iştirâki’s-seviy iştirâ ve kabûl eylediklerinden sonra yine karye-i mezbûre sınırında vâki‘ her biri beynimizde ma‘lûmü’l-hudûd olup tasarrufu babamız hâlik-i merkūmdan üçümüze intikāl eden on yedi kıt‘a tarlalardan dahi hissenin hakk-ı tasarrufunu sâhib-i arz ma‘rifetiyle yine merkūmân Yorgi ve Nikola’ya bin altı yüz mezbûrü’n-na‘t akçe mukābelesinde tefvîz edip onlar dahi iştirâken tefevvuz ve kabûl eylediklerinden sonra emlâk-i mezbûrenin semeni olan meblağ-ı merkūm ile mukābele-i tefvîzden olan akçe altı bin altı yüz akçeyi yedlerinden bi’t-tamâm ve’l-kemâl ahz ve kabz edip emlâk-i mezbûreyi mahallinde kabza ve mezâri‘-i merkūmeyi tasarrufa mezbûrât Yorgi ve Nikola’yı taslît eyledim dedikde gıbbe’t-tasdîk vicâhen mâ vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed b. Abdullah el-Müezzin, Yusuf Beşe b. Abdullah, Ali Beşe b. el-Muhzır, Mahm[u]d Çelebi b. ( ) el-Muhzır, Dimo v. Yorgi, Yani v. Kosta, Aleksi v. Piyoyani, Yorgi v. Kosta ve gayruhüm.