Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 393 Hüküm no: 506 Orijinal metin no: [82b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâmile bt. Abdullah’ın alacak davasının reddi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Takyecibaşı mahallesinde sâkinelerinden Kâmile bt. Abdullah nâm hâtun mahfil-i kazâda işbu râfi‘ü’l-kitâb zevc-i mutallıkı Derviş b. Yusuf nâm kimesne muvâcehesinde üzerine da‘vâ ve takrîr-i kelâm edip merkūm Derviş zimmetinde cihet-i karzdan iki bin akçe hakkım vardır, suâl olunup alıverilmesini taleb ederim dedikde gıbbe’s-suâl ve’l-inkâr müdde‘iye-i merkūmeden da‘vâsını mübeyyine beyyine taleb olundukda ityân-ı beyyineden izhâr-ı acz edip ba‘de’l-istihlâf yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin mûcebiyle mütâlebeden men‘ birle mâ hüve’l-vâki‘ gıbbe’t-taleb ketb olundu. Tahrîren fi’l-yevmi’r-râbi‘ ve’l-ışrîn min Zilka‘deti’ş-şerîfe seb‘a ve erba‘în ve elf. Şuhûdü’l-hâl: Süleyman Çelebi b. Veli el-İmâm, Ramazan Bey b. Derviş, Mustafa el-Bevvâbü’s-sultânî, İbrahim Beşe b. Abdullah ve gayruhüm.