Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 394 Hüküm no: 507 Orijinal metin no: [83a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. İskender’in ekmekçi fırınının tasarrufunu Eyüp Sultan Vakfı’na devrettiği Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’[de] vâki‘ Sultanhamamı kurbunda sâkine Sâliha bt. İskender nâm hâtun mahfil-i kazâda işbu râfi‘ü’l-kitâb Mehmed Bey b. Kadri mahzarında ikrâr-ı tâm ve takrîr-i kelâm edip medîne-i mezbûre sûkunda vâki‘ bir tarafı hazret-i mûmâ-ileyh evkāfı ve bir tarafı İbrahim Paşa vakfı ve bir tarafı Hibe Hoca vakfı ve bir tarafı tarîk-i âm ile mahdûd olup hazret-i müşârün-ileyh evkāfından mutasarrıfe olduğum bir bâb ekmekçi fırınının hakk-ı tasarrufunu, evkāf-ı mezbûre mütevellîsi ma‘rifetiyle merkūm Mehmed Bey’e yüz iki bin nakd-i râyic fi’l-vakt fıddî akçe mukābelesinde tefvîz edip ol dahi tefevvuz ve kabûl eyledikden sonra mukābele-i tefvîzde olan meblağ-ı merkūm yüz iki bin akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan ekmekçi fırını merkūm Mehmed Bey’in dâhil-i taht-ı tasarrufu olmuşdur dedikde mezbûre Sâliha’nın vech-i meşrûh üzre cârî ve sâdır olan ikrâr ve takrîr mezbûr Mehmed Bey vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâdis aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Efendi b. ( ) el-Hatîb, Ali Efendi b. Ahmed, Bektaş Bey b. Mehmed, Çelebi Mustafa, Hüseyin Bey b. Yusuf, Mustafa Çelebi b. İlyas, Osman Çelebi b. İbrahim, Sefer Beşe b. Abdullah ve gayruhüm.