Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 398 Hüküm no: 515 Orijinal metin no: [83b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâssa odabaşı Hasan Ağa b. Abdullah’ın suyolunun keşfi [derkenâr:] Hâssa odabaşı Hasan Ağa’nın [su yolu] Saray-ı cedîd-i sultânîde bi’l-fi‘l odabaşı olan kıdvetü’l-emâcid ve’l-ekârim câmi‘ü’l-mehâmid ve’l-mekârim Hasan Ağa b. Abdullah tarafından husûs-ı âti’z-zikre vekîl olup hasm-ı câhid mahzarında nehc-i mu‘teber-i mer‘î üzre vekâleti sâbite olan el-Hâc Osman b. Mustafa mahfil-i kazâya gelip bi’l-vekâle takrîr-i kelâm ve bast-ı merâm edip müvekkilem mezbûr mahmiye-i İstanbul’da Cündî Meydanı kurbunda vâki‘ mülk menzilinde icrâ için Havâss-ı Aliyye kazâsı müzâfâtından Terkos nâhiyesine tâbi‘ Ayvadlı nâm karye sınırında vâki‘ Bakras Deresi demekle ma‘rûf olup tahdîd ve tavsîfden müstağnî ve âharın mülküne ittisâlden âriye mevâzi‘-i hâliyeyi hafr ile âbâr-ı müteferrikadan kendi malı ile cem‘ eylediği mâ-i cârîyi menba‘ından mevzi‘-i mezbûra karîb mahalde merhûm ve mağfûrun-leh Sultan Süleyman -aleyhi rahmetü’l-gufrân- hazretlerinin binâ eyledikleri orta kemere izn-i mütevellî ile ber vech-i âdet-i ma‘rûfe-i kadîme idhâl ve nısfı cânib-i vakfa mecrâ verilip nısf-ı âharın mahmiye-i merkūmede dilediği mahalde ifrâz murâd eylediği mâ’ın cânib-i şer‘den üzerine varılıp kable’l-idhâl keşf ve vezn ve takdîr olunmasın taleb ederler dedikde savb-ı şer‘-i kadîmden mevlânâ Receb Efendi b. Abdi irsâl olunup ol dahi bi’l-fi‘l mi‘mârbaşı olan fahrü’l-emâcid ve’l-ekârim Kasım Ağa b. Abdüddâim ve su yolu nâzırı olan umdetü’l-emâsil ve’l-akrân Hasan Ağa b. Abdülmennân ve hâssa su yolcular bölükbaşısı el-Hâc İbrahim b. Sefer ve suyolculardan el-Hâc Mehmed b. Ahmed ve zeyl-i kitâbda mastûrü’l-esâmî olan müslimîn [84a] ile mahall-i mezbûra varıp ve mu‘tâd üzre vezn ve takdîr eylediklerinde mezbûre Hasan Ağa’nın zikr olunan vâdide cem‘ eylediği dört masura ve bir çuvaldız su olduğunu mezbûrların ihzârıyla mevlânâ-yı mezbûr mahallinde ketb [ve] tahrîr, ba‘dehû gelip meclis-i şer‘de vukū‘u üzre inhâ etmeğin mâ hüve’l-vâki‘ gıbbe’t-tasdîk ketb olundu. Tahrîren fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: El-Hâc Mehmed b. Hüseyin, Kalender b. Bayezid, Osman Beşe b. Bayezid, Ali b. Mustafa, Ali Çelebi b. Mustafa, el-Hâc Mehmed b. Ahmed, Mustafa b. Ahmed, Ali b. Mehmed ve gayruhüm.