Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 399 Hüküm no: 517 Orijinal metin no: [84a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Osman Efendi b. Seyyid Mustafa’nın Râcil Mustafa Çelebi b. Mehmed’den ödünç alıp evini ve dükkanını rehin verdiği Rumeli-i ma‘mûre vilâyetinde vâki‘ Pravadi kasabası mahallâtından Mellâh İbrahim mahallesi sükkânından olan fahrü’l-kuzât Seyyid Osman Efendi b. Seyyid Mustafa meclis-i şer‘-i şerîf ve mahfil-i dîn-i münîfde hâzır olup, üzerinde ve zimmetinde, bâ‘is-i hâze’l-kitâb Râcil Mustafa Çelebi b. Mehmed’e karz-ı şer‘î cihetinden râyicü’l-vakt on bin akçe ve rengi ve cinsi beynlerinde ma‘lûm olan, müşterâ-yı makbûz çuka bahâsından dört bin akçe olmak üzre cem‘an on dört bin akçe lâzımü’l-edâ ve vâcibü’l-kazâ borcu olduğunu ikrâr ve i‘tirâf etti. Karz dışındaki meblağ, zeylde mezkûr târihden bir sene tamâmına müecceldir. Ve mahalle-i mezbûrede kâin bulunan bir tarafdan üstâd Mehmed mülkü, diğer tarafdan üstâd Fazlullah mülkü, iki tarafdan da tarîk-i âm ile mahdûd menzil ve kasaba-i mezbûrede kâin bir tarafdan Yusuf Ağa mülkü, diğer tarafdan Süleyman Çelebi câmi‘i haremi, iki tarafdan da tarîk-i âm ile mahdûd bulunan dükkân, cümle tevâbi‘ ve levâhıkıyla meblağ-ı merkūm mukābili, dâyin-i mezbûr yedinde rehn-i makbûzdur. Dâyin-i mezbûr, vâki‘ ikrârı vicâhen ve şifâhen tasdîk etti. Cerâ zâlike ve hurrire fî selhi Zilka‘de eş-şerîfe sene seb‘a ve erba‘în ve elf. Şuhûdü’l-hâl: Seyyid Ömer Efendi b. Seyyid Mustafa, Mehmed Çelebi b. …?, el-Hâc Mehmed b. Hüsrev, Mehmed Çelebi b. Ramazan, Hüseyin Çelebi b. ( ), Yakub b. Kurd