Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 400 Hüküm no: 518 Orijinal metin no: [84a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe’nin mirasçılarından Sinan’ın diğer kardeşleri Ferhad, Kasım ve Selim ile sulh olduğu Vilâyet-i Rumeli’nde İsfere kazâsına tâbi‘ Ratas nâm karyede sâkin iken bundan akdem vefât eden Hasan Beşe’nin verâseti sulbî kebîr oğulları Sinan ve Ferhad ve Kasım ve Selim’e münhasıra olduğu mütehakkik ve merkūm Sinan gāib ani’l-meclis Kasım tarafından tasdîk-i âti’l-beyâna vekîl olup vekâleti nehc-i mu‘teber üzre sâbite oldukdan sonra meclis-i mezbûrda, merkūmân Ferhad ve Sinan muvâcehelerinde ikrâr ve takrîr-i kelâm edip mûrisimiz müteveffâ-yı mezbûrun cemî‘ muhallefâtından irs-i şer‘le bana intikāl eden rub‘ hisse-i şer‘iyyemden karındaşlarım ile üç bin akçe mukābelesinde şerâit-i sıhhati câmi‘ mevâni‘den ârî tehârüc-i şer‘î tarîki ile sulh olup bedel-i sulhü yedlerinden ahz ve kabz eyledim min ba‘d tereke-i merkūmeye müte‘allika mezbûrûn ile da‘vâ ve nizâ‘ım yokdur dedikde mukırr-ı mezbûru ikrâr-ı meşrûhunda merkūm Ferhad asâleten ve mezbûr Sinan asâleten ve vekâleten bi’l-muvâcehe tasdîk etmeğin mâ hüve’l-vâki‘ gıbbe’t-taleb ketb olundu. Tahrîren fi’l-yevmi’r-râbi‘ ve’l-ışrîn min Zilka‘deti’ş-şerîfe sene seb‘a ve erba‘în ve elf. Şuhûdü’l-hâl: Aydın Bey b. Sinan, Hasan Bey b. Mustafa, Hasan Beşe b. Ferhad, İbrahim Beşe b. Ferhad ve gayruhüm.