Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 400 Hüküm no: 519 Orijinal metin no: [84a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Angeli v. Mavridi’nin evini Kaskosta v. Tanaşi ile Yorgi v. Mihal’e kiraladığı Havâss-ı Aliyye kazâsı müzâfâtından Hasköy’de Papas iskelesi kurbunda sâkin Angeli v. Mavridi nâm zimmî mahfil-i kazâda işbu râfi‘ü’s-sifr şirket-i inân ile şerîkler olan Kaskosta v. Tanaşi ve Yorgi v. Mihal nâm zimmîler muvâcehelerinde ikrâr ve takrîr-i kelâm edip zikr olunan iskelede vâki‘ bir tarafdan Ahmed Ağa mülkü ve bir tarafdan Mihal nâm zimmî mülkü ve bir tarafdan sâhil-i bahr ve bir tarafdan tarîk-i âm ile mahdûd mülk menzilimi, bin kırk sekiz Muharrem’i gurresinden yedi yüz yirmi gün tamâmına değin mezbûrân Kaskosta ve Yorgi’ye dört yüz riyâlî guruşa îcâr ve teslîm eyledim mezbûrân Kaskosta ve Yorgi dahi ale’l-iştirâk istîcâr ve teslîm eylediklerinden sonra ücret-i merkūme ve dört yüz guruşu yedlerinden ahz ve kabz eyledim dedikde gıbbe’t-tasdîki’ş-şer‘î mâ hüve’l-vâki‘ gıbbe’t-taleb ketb olundu. Tahrîren fi’l-yevmi selhi Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed b. Şaban, Mustafa b. Mehmed, Yusuf b. Hüdâverdi, İbrahim b. Hasan, Ali b. Ebûbekir, Mehmed b. Mehmed, Mehmed b. Abdullah, Mustafa Beşe b. Mahmud Çukadâr, Yakub b. Kurt, Hıfzı b. Veli, Ali b. Mustafa ve gayruhüm.