Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 401 Hüküm no: 520 Orijinal metin no: [84b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Nikola’nın mirasçılarının Hristo v. Göka’daki alacak üzerinde sulh oldukları Vilâyet-i Rumeli’nde Yanya kazâsına tâbi‘ Arduçko nâm karyeden olup Havâss-ı Aliyye kazâsına tâbi‘ Karfa nâm karyede hâlik olan Dimo v. Nikola nâm zimmînin verâseti sulbî oğulları Paroş ve Roto ve Atanaş ve Nikola ve Kalo bt. Niko’ya münhasıra olduğu mütehakkik oldukdan sonra mezbûr Paroş kendi cânibinden asâleten ve karındaşları Roto ve Atanaş ve Niko ve mezbûre Kalo taraflarından husûs-ı âti’l-beyânı vekîl olup hasm-ı câhid mahzarında vekâleti Yani v. Niko ve Şiro v. Mano şehâdetleri ile sâbite oldukdan sonra vekâleten mahfil-i kazâda karye-i merkūme Karfa’da sâkin Hristo v. Göka nâm zimmî muvâcehesinde takrîr-i kelâm edip babam hâlik-i merkūm Dimo hâl-i hayâtında merkūm Hristo ile karye-i merkūmede şirket üzre bostan gars ve bey‘ edip mâl-ı şirketden mezbûr Hristo zimmî yedinde yedi bin akçesi kalmış idi deyû meblağ-ı mezbûru merkūm Hristo’dan da‘vâ edip merkūm Hristo dahi inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihî muslihûn tavassutu ile da‘vâ-yı mezbûreden merkūm Hristo benim ile an inkâr üç bin nakd-i râyic fi’l-vakt fıddî akçe üzerine inşâ-i akd-i sulh eyledikde ben dahi sulh-i mezbûru asâleten ve vekâleten kabûl edip ve bedel-i sulh yedinden ahz ve kabz eyleyip husûs-ı mesfûre müte‘allika da‘vâdan zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î vicâhen mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Çavuş b. ( ) el-Mübâşir, Mehmed Bey b. Yunus, Rıza Efendi b. Abdi, Kiro v. Yani, Yani v. Nikola, Nikola v. Yani, Yorgi v. İstani.