Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 405 Hüküm no: 527 Orijinal metin no: [84(2)a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Andriye’nin Ahmed Ağa b. Abdülmennân’a olan borcunu ödemesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Davud Ağa mahalle sâkinlerinden fahrü’l-emâsil Ahmed Ağa b. Abdülmennân tarafından meblağ-ı âti’z-zikri da‘vâya ve ahz ve kabz vekîl olup, vekâleti hasm-ı şer‘î-i câhid mahzarında Davud Halîfe b. Mehmed ve Mustafa Beşe b. Abdullah şehâdetleriyle şer‘an sâbite olan Mustafa b. Abdullah nâm kimesne mahfil-i kazâya bakkal tâifesinden Yani v. Andriye nâm zimmîyi ihzâr ve mahzarında üzerine da‘vâ edip müvekkilim mûmâ-ileyh Ahmed Ağa’nın mezbûr Yani zimmetinde cihet-i mezbûreden on iki bin akçe deyni olduğunu ikrâr edicek ikrârı mûcebince mezbûr on iki bin akçeyi vekîl-i mezbûr Mustafa’ya edâya tenbîh birle mâ vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mustafa b. Ahmed, Ali b. Mustafa, Mustafa Beşe b. Mahmud Çukadâr, Yakub b. Kurt, Mahmud b. Ahmed, Mustafa b. Veli.