Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 405 Hüküm no: 528 Orijinal metin no: [84(2)b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdünnebi Çavuş b. Hüseyin Çavuş’un evini Hasan Bey b. Şemseddin’e sattığı Mahmiye-i Kostantıniyye mahallâtından Mahmud Paşa mahallesi sâkinlerinden Abdünnebi Çavuş b. Hüseyin Çavuş tarafından bey‘-i âti’z-zikri ve kabz-ı semeni ikrâra vekîl olup vekâleti hasm-ı şer‘î-i câhid mahzarında el-Hâc Ahmed b. Hasan ve el-Hâc Abdülkerim b. Abdullah şehâdetleriyle sâbite olan Hasan Bey b. Şemseddin mahfil-i kazâda işbu hâmilü’l-kitâb Hasan b. Mehmed mahzarında bi’l-vekâle ikrâr ve takrîr-i kelâm edip müvekkilim mezbûr Abdünnebi Çavuş mahmiye-i mezbûre hısnı ebvâbından Yenikapı hâricinde Merkez Efendi mahallesinde vâki‘ bir tarafdan Âişe Hâtun bt. Abdullah mülkü ve bir tarafdan Bekir b. Osman mülkü ve bir tarafdan tarîk-i âm ile mahdûd bir bâb tahtânî beyti ve sundurmayı ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire cüneyneyi müştemil mülk menzilimi, cümle-i tevâbi‘ ve levâhıkı ve kâffe-i menâfi‘i ve merâfıkı ile mezbûr Hasan’a fıddî nakd-i râyic fi’l-vakt iki bin altı yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr iki bin altı yüz akçeyi bi’t-tamâm ve’l-kemâl mezbûr Hasan tarafından ahz ve kabz eyledi ba‘de’l-yevm zikr olunan menzil-i mezbûr Hasan’ın mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde vekîl-i mezbûr Hasan Bey’in minvâl-i muharrer üzre bi’l-vekâle sâdır olan ikrârı el-mukarru lehü’l-merkūm Hasan bi’l-muvâcehe tasdîk ve bi’l-müşâfehe tahkīk etmeğin mâ vaka‘a bi’t-taleb ketb olundu. Tahrîren fî gurreti Zilhicce li sene seb‘a ve erba‘în ve elf. Şuhûdü’l-hâl: Muslihiddin Efendi b. Ahmed el-İmâm, Ahmed Halîfe b. Muslihiddin el-İmâm, İbrahim b. Abdullah, Abdullah b. Hasan, Yakub b. Kurt, Mustafa b. Veli, Mahmud Halîfe b. Hasan el-Müezzin, Mustafa Dede el-Kayyım, Ali b. Mustafa.