Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 406 Hüküm no: 529 Orijinal metin no: [84(2)b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Zeyneddin b. Abdullah Vakfı’na ait evin tamirine izin verildiği Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Câmi‘-i Kebîr mahallesinde vâki‘ bir tarafdan Mehmed b. Ali mülkü ve bir tarafdan vakıf menzil ve bir tarafdan Seher bt. Abdullah nâm hâtun mülkü ve bir tarafdan tarîk-i hâs ile mahdûd bir oda fevkānî beyti ve altında dehlizi ve bir bâb tahtânî beyti ve zât-ı eşcâr-ı müsmire ve gayr-ı müsmire hadîkayı müştemil olup merhûm el-Hâc Zeyneddin b. Abdullah nâm sâhibü’l-hayrın vakf ve süknâsını sulehâya şart eylediği vakıf menzile, sulehâdan olup ber mûceb-i şart-ı vâkıf mutasarrıf olan Mehmed b. Ali mahfil-i kazâya gelip takrîr-i kelâm ve ta‘bîr-i ani’l-merâm edip menzil-i mezbûr mürûr-ı eyyâm ile harâba müşrif olmağla ta‘mîr [ve] meremmete muhtâc mevâzi‘ini ta‘mîr [ve] meremmet edip ve zikr olunan tahtânî beyt bi’l-külliye münhedim olmağla müceddeden binâ eylemek murâd ederim taraf-ı şer‘den üzerine varılıp keşf ve tahrîr ve nukzunu tahmîn-i sahîh ile tahmîn olundukdan sonra eylediğim ta‘mîr ve meremmet vakfa teberru‘ olup ve müceddeden eylediğim binâ mülküm olmak üzre binâ ve ta‘mîre izin taleb ederim dedi[kde] savb-ı şer‘-i kadîmden mevlânâ Mustafa Efendi irsâl olunup ol dahi hâssa mi‘mârlardan üstâd Musli Çelebi b. Hüsameddin ve menzil-i mevkūf-ı mezbûr mütevellîsi olan Ali Dede b. Veli ve zeyl-i kitâbda mastûrü’l-esâmî olan müslimîn ile menzil-i mezbûrun üzerine varılıp müşâhede olundukda fi’l-hakīka menzil-i merkūm ta‘mîre muhtâc olduğundan mâ‘adâ zikr olunan tahtânî beyti bi’l-külliye münhedim olmağın müceddeden binâ olunması lâzım olduğu ecilden nukzu tahmîn-i sahîh ile tahmîn olundukda, ancak bin akçe kıymetli nukzu olduğuna mi‘mâr-ı merkūm ve sâir ahâlî-i vukūf icmâ‘ ve ittifâk eylediklerinde mevlânâ-yı mezbûr mahallinde ketb [ve] tahrîr, ba‘dehû meclis-i şer‘de alâ vukū‘ihî ihbâr ve takrîr etmeğin mezbûr Mehmed’e menzil-i mezkûru vech-i meşrûh üzre binâ ta‘mîre izin birle mâ hüve’l-vâki‘ ketb olundu. Fi’l-yevmi’t-tâsi‘ aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Dede b. Yusuf, İbrahim b. Mehmed, el-Hâc Mustafa b. Ahmed, üstâd Ahmed b. Mustafa, Abdullah b. Mustafa, Ahmed b. Ali, Yakub b. Kurt.