Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 407 Hüküm no: 530 Orijinal metin no: [84(2)b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yunus Beşe b. Halil’in çiftlik ve arsalarını Cafer b. Abdullah’a sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-muzâfâtından Küçük Halkalı nâm karye sâkinlerinden Yunus Beşe b. Halil mahfil-i kazâda Cafer b. Abdullah muvâcehesinde ikrâr ve takrîr-i kelâm edip karye-i mezbûrede vâki‘ bir tarafı Mehmed Çavuş mülkü ve bir tarafı Bekir Beşe mülkü ve bir tarafı Evranos Mustafa mülkü ve bir tarafı tarîk-i âm ile mahdûd iki bâb tahtânî beyti ve bir samanlığı ve bir ahırı ve hadîkayı ve eşcâr-ı müsmire ve gayr-ı müsmireyi müştemil çiftliğimi mezbûr Cafer’e sekiz bin nakd-i râyic fi’l-vakt kabz-ı akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ol dahi iştirâ ve kabûl eyledikden sonra yine karye-i mezbûre hudûdu dâhilinde sâhib-i arz ma‘rifetiyle mutasarrıf olduğum yedi kıt‘a tarlaları dahi iki bin beş yüz akçe bedel mukābelesinde mezbûr Cafer’e ferâğ ve tefvîz, ol dahi tefevvuz ve kabûl eyledikden sonra semen-i mezbûr sekiz bin akçe ve bedel-i merkūm iki bin beş yüz akçe ki cem‘an on bin beş yüz akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm mezbûr Cafer’in mezkûr çiftlik mülk-i müşterâsıdır ve tarlaları dahi tasarrufundadır, keyfe mâ yeşâ’ ve yahtâr mutasarrıf olsun dedikde mukırr-ı mezbûrun ikrârını vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Tahrîren fî selhi [Zilka‘deti’ş-şerîfe] li sene seb‘a ve erba‘în ve elf. Şuhûdü’l-hâl: Üstâd Mehmed b. Mustafa, Cafer b. Mustafa er-Râcil, Abdülkerim b. Mustafa, Osman Beşe b. Ömer, Mahmud Çavuş karye-i mezbûrdan, üstâd Mehmed karye-i mezbûrdan, Bekir b. Abdullah karye-i mezbûr[dan], Mahmud Çelebi, Yakub b. Kurt.