Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 408 Hüküm no: 531 Orijinal metin no: [84(2)b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Altun bt. Mehmed’in ev ve bağdaki hisselerini Rüstem b. Ahmed’e sattığı Vilâyet-i Rumeli’nde Premedi kazâsına tâbi‘ Orgarilos nâm karye sâkinlerinden Altun bt. Mehmed nâm hâtun tarafından bey‘-i âti’z-zikr ve semenini kabz ve îsâle vekîl olup vekâleti hasm-ı şer‘î-i câhid mahzarında mezbûreyi ma‘rifet-i şer‘iyye ile ârifân olan Süleyman b. Mustafa ve Sinan b. Abdullah şehâdetleriyle sâbite olan zevci Mehmed b. Abdullah mahfil-i kazâda işbu râfi‘ü’l-kitâb Rüstem b. Ahmed mahzarında ikrâr ve takrîr-i kelâm edip müvekkile-i mezbûre Altun’un li ebeveyn karındaşı Elîfe ile ale’l-iştirâki’s-seviy mülkleri olup karye-i mezbûrede vâki‘ bir tarafdan Göka v. Kika mülkü ve bir tarafdan Ali b. Mehmed tarlası ve bir tarafdan kilise ve bir tarafdan tarîk-i âm ile mahdûd üç bâb tahtânî beyti ve samanlığı müştemil menzilde ve beynimizde hudûdu ma‘lûm üç kıt‘a bağ [85a] ve yirmi dip tut ağaçlarından müvekkilemin nısf hisse-i şâyi‘asını, vekâletim hasebiyle mezbûr Rüstem’in kız karındaşı Elîfe izniyle iki bin nakd-i râyicü’l-vakt fıddî akçeye bey‘-i bâtt-ı sahîh-i şer‘î ile bey‘ edip ol dahi iştirâ ettikden sonra semen-i mezbûreyi bi’t-tamâm yedinden ahz ve kabz eyledim ba‘de’l-yevm hisse-i mezbûr merkūm Rüstem’in mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâmin min Zilhicceti’l-harâm li sene seb‘a ve erba‘în ve elf. Şuhûdü’l-hâl: Sinan Bey b. Mehmed, Diğer Sinan Bey b. Abdullah, Süleyman b. Yakub, İbrahim b. Abdullah, Hasan b. Memi, Mehmed b. Hasan, Mehmed b. Memi ve gayruhüm.