Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 408 Hüküm no: 532 Orijinal metin no: [85a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kösec Hasan Vakfı’ndan olan evin kullanım hakkının Takyecibaşı Mescidi’nin imamına ait olduğu Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’de vâki‘ merhûm Takyecibaşı Mescid-i şerîfinin bi’l-fi‘l imâm[ı] olan İshak Halîfe b. Veli mahfil-i kazâda menzil-i âti’l-beyâna vâzı‘ü’l-yed olan Mustafa Bey b. Abdullah nâm kimesneyi ihzâr ve mahzarında üzerine da‘vâ edip bundan akdem Kösec Hasan b. Küçük nâm kimesne vakf edip tevliyyet-i süknâsını evvelâ kendi nefsine ba‘dehû evlâdına ve evlâd-ı evlâdına ve evlâd-ı evlâdına ba‘de’l-inkırâz zikr olunan mescid-i şerîfde her kim imâm olursa mutasarrıf ola deyû şart eylediği medîne-i mezbûr mahallâtından Davud Ağa mahallesinde vâki‘ bir tarafı Hüseyin Çelebi b. Ali ve bir tarafı peremeci Mustafa mülkü ve iki tarafı tarîk-i âm ile mahdûd olup iki bâb tahtânî odaları ve bir çardağı ve ahırı ve bi’r-i mâyı ve kenîfi ve cüneyne ve zât-ı eşcâr-ı müsmire ve gayr-ı müsmire müştemil olan menzile vâkıf-ı mezbûrun evlâdından mutasarrıfe olan Rahime bt. Ferah nâm hâtun müteveffât olup vâkıf-ı mezbûrun evlâdı münkariz olmağla menzil-i mezbûrun tevliyyet ve süknâsı ber mûceb-i şart-ı vâkıf bana intikāl etmişiken mezbûr Mustafa tasarrufuma mâni‘ olur, vâki‘ hâl suâl olunup kasr-ı yedine tenbîh olunması matlûbumdur dedikde gıbbe’s-suâl mezbûr Mustafa Bey menzil-i merkūm-ı mezbûr Kösec Hasan’ın vakfı olup süknâsı minvâl-i muharrer üzre müdde‘î-i merkūme intikāl eylediğini ikrâr ve i‘tirâf etmeğin mûcebiyle menzil-i mezbûrdan kasr-ı yed edip şart-ı vâkıf üzre içinde sâkin olmak için imâm-ı mezbûr İshak Halîfe’ye teslîme tenbîh birle mâ hüve’l-vâki‘ gıbbe’t-taleb ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Halîfe b. Mahmud, Mustafa Efendi b. Mehmed, Ali Efendi b. Mustafa, Mustafa Beşe b. Mehmed Çukadâr, Hüseyin b. Abdullah, Ali Efendi b. Mustafa, Ahmed b. ( ) el-Kayyım, el-Hâc Davud b. ( ) el-Müezzin.