Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 233 Hüküm no: 237 Orijinal metin no: [30a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mehmed’in, Yasef v. İlya’ya yirmi adet kösele verdiğinin tespiti Mahmiye-i İstanbul’da Kethüdâ Hâtun mahallesinde sâkin işbu bâ‘isü’l-kitâb Ahmed b. Mehmed nâm kimesne mahfil-i kazâda Yanbolu cemâ‘atinden Yasef v. İlya nâm Yahudi muvâcehesinde üzerine da‘vâ ve takrîr-i kelâm edip târih-i kitâbdan dört ay mukaddem mahmiye-i mezbûrede bi’l-fi‘l gümrük emîni olan Mahmud Ağa’ya def‘ ve teslîm eyle deyû şerîkim olup oğlum olan gāib ani’l-meclis Mehmed nâm kimesne bir def‘a on aded kösele ve bir def‘a dahi on aded kösele cem‘an yirmi aded köseleyi def‘ ve teslîm, ol dahi yedinden ahz u kabz edip emîn-i mezbûra on aded köseleyi teslîm edip bâkī zimmetinde on aded kösele kalmışdır suâl olunsun dedikde, gıbbe’s-suâl mezbûr Yasef cevâbında mezbûr Mehmed yedinden ancak on aded köseleyi ahz ve emîn-i mûmâ-ileyhe teslîm eyledim deyû on aded kösele ahz eylediğini ikrâr ve ziyâdeyi inkâr edicek müdde‘î-i mezbûrdan müdde‘âsını mübeyyine beyyine taleb olundukda İsa Beşe b. Ahmed ve Ali b. Zülfikār nâm kimesne li ecli’ş-şehâde meclis-i şer‘a hâzırân olup isre’l-istişhâd fi’l-hakīka târih-i mezbûrda merkūm Mehmed mezbûr Yasef’e emîn-i müşârün-ileyhe teslîm eyle deyû bir def‘a on aded kösele [30b] ve bir def‘a dahi on aded kösele cem‘an yirmi aded köseleyi bizim huzûrumuzda ref‘ ve teslîm ol dahi yedinden ahz u kabz eyledi bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince emîn-i mezbûra teslîm olunan on aded köseleden mâ‘adâ mezbûr Yasef zimmetinde bâkī kalan on aded köseleyi müdde‘î-i mezbûr Ahmed’e def‘ ve teslîme merkūm Yasef’e tenbîh birle mâ vaka‘a bi’t-taleb ketb olundu. Fi’l-yevmi’s-sânî min Cumâdelâhire li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah Bey b. Mustafa, İbrahim Çelebi b. Ömer, Hasan Çelebi b. ( ).