Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 234 Hüküm no: 238 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todoraki Reis’in Mustafa Çavuş’a olan borçlarına karşılık bağlarını rehin verdiği Mahrûse-i Galata müzâfâtından Kapıdağı nâhiyesinde Muhaniye nâm karye ahâlîsinden Todoraki Reis v. Dimitraki nâm zimmî meclis-i şer‘-i şerîf-i Ahmedî ve mahfil-i dîn-i münîf-i Muhammedî’de dergâh-ı âlî -dâme merci‘an li’l-e‘âlî- çavuşlarından fahrü’l-eşbâh bâ‘isü’l-kitâb Mustafa Çavuş b. Abdullah mahzarında ikrâr ve takrîr-i kelâm edip mûmâ-ileyh Mustafa Çavuş’a def‘ eylediğim hüccet nâtıka olduğu üzre akd-i âtî sudûruna değin yedinde mülküm ve hakkım olup karye-i mezbûrede Ornete nâm mevzi‘de vâki‘ sekiz bin çubuklu bir kıt‘a bağımı ve Hankorahi nâm mevzi‘de vâki‘ bin beş yüz çubuklu bir kıt‘a bağımı ve Kelem nâm mevzi‘de vâki‘ cümlesi üç bin çubuklu üç kıt‘a bağımı ve yine zikr olunan Kelem nâm mevzi‘de vâki‘ üç armud ağaçlı bin çubuklu bir kıt‘a bağımı ve Elyot Terize nâm mevzi‘de vâki‘ beş yüz çubuklu bir kıt‘a bağımı ve Marviz nâm mevzi‘de vâki‘ beş yüz çubuklu bağımı ve Kınalı nâm mevzi‘de vâki‘ beş yüz çubuklu bağımı ve Sultar nâm mevzi‘de vâki‘ bin çubuklu iki kıt‘a bağımı cem‘an on altı bin çubuklu her birinin hudûdu beynimizde ma‘lûme zikirleri mürûr eden on bir kıt‘a bağlarımı mûmâ-ileyh Mustafa Ağa’ya cihet-i karzdan deynim olan yüz doksan iki buçuk esedî guruş ve semeni târih-i kitâb şehri gurresinden bir sene tamâmına değin müeccel yedinden müşterâ ve makbûz beynimizde ma‘lûm yirmi beş zirâ‘ iskarlet çuka bahâsından deynim olan yüz altmış iki buçuk esedî ki cem‘an üç yüz elli beş esedî guruş deynim mukābelesinde mûmâ-ileyh Mustafa Çavuş’a rehn verip ol dahi irtihân ve kabûl edip zikr olunan rihânı mahallerinde kabza tarafından nâhiye-i mezbûreye tâbi‘ Yehreme? nâm karye ahâlîsinden hâzır bi’l-meclis Lambirnos Reis v. Yani nâm zimmîyi vekîl edip ol dahi vekâlet-i mezbûremi kabûl eyledikden sonra müddet-i mezbûre tamâmında rihân-ı mezbûreyi bey‘a ve semenlerinden deyn-i mezbûru edâya ve fazla kalırsa bana îsâle tarafımdan mezbûr Lambirnos Reis’i küllemâ azeltüke fe-ente vekîli mazmûnu üzre azl ve in‘izâlden masûne vekâlet-i devriye ile vekîl ve menâbıma nâib nasb ve ta‘yîn edip ol dahi vekâlet-i mezbûremi kabûl ve merâsimini edâya ta‘ahhüd eyledi dedikde, mukırr-ı mezbûru mûmâ-ileyh Mustafa Çavuş ile mezbûr Lambirnos Reis cemî‘ kelimâtında vicâhen tasdîk ve şifâhen tahkīk eylediklerinden sonra mezbûr Lambirnos Reis emr ve kabûlü hâviye kefâlet-i sahîha-i şer‘iyye ile deyn-i mezbûre üç yüz elli beş guruşa kefîl olmağın mâ hüve’l-vâki‘ bi’l-ibtigā ketb ve imlâ olundu. Fi’l-yevmi’l-hâmis min Cumâdelâhire li sene seb‘a ve seb‘în ve elf. Şuhûdü’l-hâl: Fahrü’l-kuzât Mehmed Efendi b. Abdülbâkī, Mehmed Çelebi b. Abdullah Kethüdâ-yı muhzırân, Şükrullah Bey b. Mustafa, Abdi Çelebi b. Hüseyin, Hasan Çelebi b. Ahmed.