Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 409 Hüküm no: 533 Orijinal metin no: [85a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem b. Ahmed’in evini ve bağlarını Göka’nın oğulları Kika ve Yanoş’a sattığı Vilâyet-i Rumeli’nde Premedi kazâsına tâbi‘ Orgarilos nâm karyede vâki‘ bir tarafdan Göka v. Kika mülkü ve bir tarafdan kilise ve bir tarafdan Ali b. Mehmed mülkü ve bir tarafdan tarîk-i âm ile mahdûd olan menzil ile zikirleri âtî bâyi‘ ve müşterâ beynlerinde her birinin hudûdu ilm-i şer‘î ile ma‘lûm yirmi dip tut ağacını müştemil olan üç kıt‘a bağın nısf-ı şâyi‘i Rüstem b. Ahmed’in ve nısf-ı âharı zevcesi Elîfe bt. Mehmed’in mülkü olduğu müte‘ayyin ve mezbûr Elîfe fevt olup verâseti zevci merkūm Rüstem ile sadriye sagīre kızı Kerime’ye münhasıra olduğu şer‘an mütehakkik oldukdan sonra mezbûr Rüstem kendi tarafından asâleten ve sagīre-i merkūme Kerime tarafından babası olup mahmûdü’l-hâl olmağla velâyeten mahfil-i kazâda işbu bâ‘isü’l-kitâb Kika ve Yanoş veledey Göka nâm zimmîler muvâcehelerinde ikrâr-ı tâm ve takrîr-i kelâm edip mezbûrân Kika ve Yanoş’a zikr olunan menzil ile üç kıt‘a bağı safka-i vâhide ile sekiz bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip mezbûrlar dahi ale’l-iştirâki’s-seviy iştirâ eylediklerinden sonra semen-i mezbûr bi’t-tamâm yedlerinden ahz ve kabz edip mebî‘ât-ı mezkûrâtı mahallinde kabza merkūmânı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî min Zilhicceti’l-harâm li sene seb‘a ve erba‘în ve elf. Şuhûdü’l-hâl: Sinan Bey b. Mehmed, Diğer Sinan Bey b. Abdullah, Süleyman b. Yakub, İbrahim b. Abdullah.