Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 412 Hüküm no: 538 Orijinal metin no: [85b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgola v. Yani’nin evini Yani v. Kosta’ya sattığı Vilâyet-i Rumeli’nde kasaba-i İzdin mahallâtından Tekseri mahallesi sâkinlerinden Yorgola v. Yani nâm zimmî meclis-i şer‘-i şerîf-i hatîr-i lâzımü’t-tevkīrde işbu hâmilü’s-sifr Yani v. Kosta nâm zimmî muvâcehesinde bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Aleko v. Yorgi mülkü ve bir tarafdan Yanco v. Franko mülkü ve bir tarafdan Dimitri v. Yorgi mülkü ve bir tarafdan Pavlo v. ( ) mülkü ile mahdûd bir bâb fevkānî ve bir bâb tahtânî iki beyti ve fırını ve bir ahırı ve muhavvata-i zât-ı eşcâr-ı müsmire ve gayr-ı müsmireyi müştemil mülk menzili, cümle tevâbi‘ ve levâhıkı ve kâffe-i menâfi‘ ve merâfıkı ile mezbûr Yani’den fıddî nakd-i râyic fi’l-vakt üç bin altı yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr üç bin altı yüz akçeyi yedinden bi’t-tamâm ve’l-kemâl ahz ve kabz edip ve mebî‘-i mezbûru mahallinde tasarrufa müşterî-i mezbûr Yani’yi taslît eyledim ba‘de’l-yevm zikr olunan menzil-i mezbûr Yani’nin mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâlis min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Bey b. Abdullah, Mahmud b. Ahmed, Mustafa b. Veli, Receb Efendi b. Abdi, Yani v. Yorgo, Niko v. Apostol, Niko v. Kika, Bumi v. Dimo, Aleksi v. Apostol.