Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 235 Hüküm no: 239 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müslüman ve zimmi boyacıların bogasi kumaşı boyama ve perdahlamayla ilgili anlaşmaları Efendi hazretleri imzâsıyla Mahmiye-i İstanbul’da boyacı tâifesinin kethüdâları Mustafa Bey b. Veli ve ihtiyârlarından Zekeriya b. Mehmed ve Hacı Süleyman b. Mehmed ve Mustafa b. Ali ve Hasan Beşe b. Mustafa ve Mehmed b. Abdullah ve Dilâver Beşe b. Abdullah ve Hacı Hızır b. Abdi ve Mehmed b. Sefer ve Ali b. Mahmud nâm kimesneler meclis-i şer‘-i hatîr-i lâzımü’t-tevkīrde tâife-i mezbûre zimmîlerin yiğitbaşıları Zakari v. Aleksandra ve Manol v. Dimo ve Zaharya v. Yorgi ve Aleksi v. Kolo ve Yanaki v. Lamberlu ve Yani v. Nikola ve Dimitri v. Zakari nâm zimmîler muvâcehelerinde her biri takrîr-i kelâm ve ta‘bîr ani’l-merâm edip kadîmden bâzirgân ve ehl-i dükkân metâ‘ı olan bogasiyi biz boyayı gelip zimmîler pâreci ta‘bîr olunup ancak kebeci bogasisini boyayıp anların boyadığı bogasiyi müslümânlar perdâht edegelmiş iken bu yakında zimmîler dahi bâzirgân ve ehl-i dükkân bogasilerini istedikleri boyaya boyamak ile bize küllî ihtilâl vermekle olagelmişe muhâlif iş etmemeleri bâbında taraf-ı saltanat-ı aliyyeden yedimize emr-i şerîf-i cihân-mu‘tâ‘ dahi verilip lâkin biz dahi mezbûrların boyadıkları bogasiyi perdâht etmemekle beynimizde nice kīl u kāl vâki‘ olmuşidi el-hâletü hâzihî hırfetimizden zimmî tâifesi kat‘â hanlardan yâhud yolcu bâzirgânlardan bogasi almayıp ve boyamayıp ancak çarşılarımızda olan ehl-i dükkânın donluk ta‘bîr olunan bogasilerini perçemî? ve al ve innâbî ve lâciverdîden istedikleri levne boyayıp gayrı levne boyamayıp ve kebeci bogasisini ve ipek ve kumaş ve iplik ve çuka ve dimi her kimin olursa istedikleri levne boyayıp zimmîlerin boyadığı bogasiyi kadîmden olageldiği üzre müslümânlar perdâht edip müslümânlar dahi gerek bâzirgân ve gerek ehl-i dükkânın acem ve donluk ve sâir bogasileri elvân-ı mezkûre ve sâir elvândan istedikleri levne boyayıp tarafeynden birine ta‘yîn olunan[a] taraf-ı âhardan kimesne müdâhale etmeyip içimizden her kim tecâvüzlük ederse zecr ve men‘ olunmak üzre kavl ve ittifâk ve ahd [ve] vifâk eyledik vech-i muharrer üzre olan ittifâkımız tağyîr olunmamak üzre hüccet olunmak matlûbumuzdur dediklerinde mezbûrlara intizâm-ı umûrları için müsâ‘ade olunup vech-i muharrer üzre olan ittifâkları tegayyür olunmamak üzre bu vesîka-i enîka ketb ve terkīm olunup yed-i tâlibe def‘ ve i‘tâ olundu. Fi’l-yevmi’s-sâdis min Cumâdelâhire li sene seb‘a ve seb‘în ve elf. Şuhûdü’l-hâl: eş-Şeyh İvaz Efendi b. İshak, Mehmed Çavuş el-Mübâşir, Şaban Ağa-yı muhzırân, Mehmed Çelebi Kethüdâ-yı muhzırân.