Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 417 Hüküm no: 547 Orijinal metin no: [86b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın ev ve hayvanlarını Aliye bt. Ali Hatun’a sattığı Mahmiye-i İstanbul’da Odabaşı çarşısı kurbunda Koruk Mahmud mahallesinde sâkine Âişe bt. Mustafa nâm hâtun mahfil-i kazâda işbu râfi‘ü’l-kitâb Aliye bt. Ali Hâtun mahzarında bi tav‘ihâ ikrâr ve i‘tirâf edip Havâss-ı Aliyye kazâsı müzâfâtından Terkos nâhiyesine tâbi‘ Çilingir nâm karyede vâki‘ bir tarafı Mehmed Efendi mülkü ve üç tarafı tarîk-i âm ile mahdûd üç bâb tahtânî odaları ve sofaları ve ahırı ve samanlığı ve yine bir odayı ve iki fırını ve iki çatma anbarı ve cüneyne-i zât-ı eşcâr-ı müsmire ve gayr-ı müsmireyi müştemil çiftlik ta‘bîr olunur mülk menzilimi, cümle tevâbi‘ ve levâhıkı ve kâffe-i menâfi‘ ve merâfıkı ile ve içinde mevcûd olan otuz iki re’s kara sığır ineklerini mezbûre Aliye Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile seksen bin nakd-i râyic fi’l-vakt fıddî akçeye bey‘ ve teslîm edip ol dahi [87a] vech-i muharrer üzre iştirâ ve tesellüm eyledikden sonra semen-i mezbûr seksen bin akçeyi yedinden bi’t-tamâm ahz ve kabz eyledim ve yine kadîmden çiftlik-i mezbûra intimâ ile tecdîd ve tavsîfden müstağnî olup mevâzi‘-i müteferrika vâki‘ merhûm ve mağfiret-nişân Ebü’l-fethSultan Mehmed Hân evkāfı arâzisinden tapu ile mutasarrıf olduğum on üç kıt‘a tarla ve üç kıt‘a çayırın dahi hakk-ı tasarrufunu, evkāf-ı mezbûre mütevellîsi ma‘rifetiyle on beş bin nakd-i mezbûrü’n-na‘t akçeye bedel mukābelesinde mezbûre Aliye Hâtun’a tefvîz edip ol dahi tefevvuz ve kabûl eylemeğin bedel-i tefvîz olan meblağ-ı mezbûrdan beş bin akçeyi dahi yedinden tamâmen ahz ve kabz eyledim ba‘de’l-yevm menzil-i mezbûr ve zikr olunan inekler mezbûre Aliye Hâtun’un mülk-i müşterâsı ve mezâri‘-i merkūme ve çayırlar dahi taht-ı tasarrufu olmuşdur dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fî gurreti Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Es-Seyyid Mehmed Çelebi b. Ebûbekir, Mehmed Çavuş b. Abdi, Hüseyin b. Hasan el-Kâtib, Ahmed Çelebi el-Attâr, Yakub b. Kurd, Receb Efendi b. Abdullah, Mustafa b. Ahmed ve gayru[hüm].